آدم جوحي يحسم اختياره بين منتخبي مصر وفنلندا.. ويحدد أفضل لاعبي الفراعنة | خاص
بين ملاعب فنلندا الباردة وقلب ينبض بحب مصر، يبرز اسم آدم جوحي، الشاب صاحب الـ18 عامًا، الذي شق طريقه في الدوري الفنلندي الممتاز مع فريق غنيستان، آدم ليس مجرد لاعب وسط موهوب، بل هو قصة طموح مصرية فنلندية يحلم من خلالها بالوصول إلى أعلى المستويات.
وضمن سلسلة حوارات مزدوجي الجنسية التي يقدمها القاهرة 24، كشف آدم عن موقفه من تمثيل منتخب مصر أو فنلندا، كما تحدث عن رأيه في الدوري المصري، واللاعبين الذين يفضل متابعتهم، وطموحاته خلال الفترة المقبلة.
إلى نص الحوار:
في البداية، كلمنا عن بدايتك مع الكرة وإزاي وصلت لمكانك دلوقتي؟
بدأت رحلتي في نادي هونكا، وهو واحد من أكبر الأندية في فنلندا، لكن النادي للأسف تعرض للإفلاس، بعدها انتقلت لنادي كابا في دوري الدرجة الثانية وأنا عندي 17 سنة، ولعبت هناك موسمين، ومنها انتقلت لفريقي الحالي غنيستان في الدوري الممتاز.
إيه أكتر فترة في مسيرتك حسيت فيها بالنجاح ومستمتع فيها بالكرة؟
الحقيقة هي الشهور الأخيرة دي مع غنيستان، لأنني بأخد وقت أطول في اللعب ومستمتع جدًا بالمشاركة في الدوري الممتاز.
ما هي قصة انضمامك لـ غنيستان وكيف وصلت للفريق الأول؟
لما كنت في الدرجة الثانية مع كابا، قدمت أداء كويس وسجلت هدفين وصنعت 8 أهداف، نادي غنيستان كان متابعني، وبعد انتهاء الموسم وقعت معاهم، البداية كانت صعبة شوية عشان أتعود على الأجواء، وكنت بقعد دكة كتير، لكن الحمد لله بدأت أتطور وبقيت بلعب كتير دلوقتي.
معاك جنسيات إيه؟ وهل بتزور مصر كتير؟
معايا الجنسية الفنلندية، والمصرية طبعًا، بس محتاج أنزل مصر عشان أجدد باسبوري المصري، والدي مصري ووالدتي فنلندية، وعلاقتي بمصر قوية جدًا وبحب الشعب المصري، وفي الإجازات دايمًا بروح هناك عشان أزور أهلي.
تعرف إيه عن الدوري المصري؟ ومين اللاعيبة اللي بتابعهم في الأهلي والزمالك؟
أعرف طبعًا إن الدوري المصري مستواه عالي جدًا وفيه منافسة قوية، ولاعيبة كتير منه بيلعبوا في المنتخب، عارف الأهلي والزمالك وإنهم أكبر ناديين في مصر ومن الأكبر في العالم كمان، بالنسبة للاعيبة، عجبني جدًا أداء إمام عاشور وياسر إبراهيم في كأس العالم، واعتقد أن إمام هو الأفضل في مصر.
لو جالك عرض من نادي مصري كبير، ممكن توافق؟
طبعًا، لو العرض كويس وهيفيد مسيرتي الكروية، أكيد هفكر فيه وأوافق.
تختار تمثل منتخب مصر ولا فنلندا؟ وهل حد منهم كلمك قبل كده؟
هختار اللي يكلمني الأول، بالنسبة لفنلندا، تم استدعائي لقائمة الانتظار في منتخبات الناشئين والشباب تحت 17 و18 و21 سنة، لكن لم أشارك رسميًا بعد، أما منتخب مصر، فلم يتواصل معي أحد حتى الآن، وإن شاء الله ده يحصل في المستقبل.
إيه نصيحتك للاعيبة المصريين اللي بيحلموا يحترفوا في أوروبا؟
نصيحتي ليهم إنهم يكملوا في طريقهم، أنا عارف إن فيه لاعيبة مصريين كتير عندهم جودة عالية جدًا تخليهم يلعبوا برا، اصبروا واشتغلوا على نفسكم وهتوصلوا.
إيه أكتر أكلة مصرية بتحبها؟ ومين هو قدوتك في الكرة؟
أكلتي المفضلة هي الكشري بلا منازع، وقدوتي عربيًا طبعًا هو محمد صلاح، وعالميًا كنت دايمًا بشوف كريستيانو رونالدو قدوة ليا من صغري.
شايف إيه اللي بيقدمه محمد صلاح وعمر مرموش دلوقتي؟ والناس برا بيتكلموا عن صلاح إزاي؟
صلاح ومرموش هما أكبر نجوم مصر دلوقتي ولاعيبة كبار جدًا، وهما قدوة لناس كتير، هنا في فنلندا، الكل عارف إن محمد صلاح واحد من أعظم اللاعيبة في تاريخ الدوري الإنجليزي عبر التاريخ.
ما هي طموحاتك الفترة المقبلة؟ ومن أحسن لاعب خط وسط في التاريخ من وجهة نظرك؟
طموحي ألعب برا فنلندا في دوري أقوى، وأوصل للمنتخب الوطني، بالنسبة للأفضل، بشوف إنييستا هو أعظم لاعب وسط في التاريخ.
