باسم يوسف لسامح أبو العرايس: “الإله حورس بيحبك وقالي لولا الملامة كان أعلنك خليفته” (صورة)

علق الإعلامي باسم يوسف، على سامح أبو العرايس، الخبير الاقتصادي، والذي قال إن الإله “حورس” سيغض على اللاعب المصري محمد صلاح، بسبب صوره مع باسم يوسف في حفل “GQ Men Of The Year 2019”.

وكتب أبو العرايس تعليق على منشور باسم يوسف قال فيه: “الإله حورس سيغضب عليك يا محمد صلاح لأنك بتتصور مع باسم يوسف اللي من أتباع ست اله الشر.. حورس كان بيدعمك ويمدك بطاقة روحانية وقدرات ما ورائي تمكنك من التحكم بالكورة وتحقيق أهداف ونجاح.. لو حورس غضب عليك وأنزل عليك لعنته ستفشل.. خلي بالك.. وابعد عن محمد صلاح يا باسم أنت والهك ست إله الشر”. باسم يوسف لم يترك التعليق يمر مرور الكرام، فرد على أبو العرايس قائلًا: “يا أستاذ عرايس والله أنت فاهم غلط: الإله ست كان جه قبل كده و حاول يتصور معايا. قلتله ابدااااااا؛ ده الأستاذ عرايس حذرني منك وابعد ياللا من هنا يا وحش وقلتله ألفاظ قبيحة و كده. المهم توعدني وقال كلام وحش وكمان جاب سيرتك بالباطل (مش باسخنك ولا حاجة بس ده واد إله عيل سو ولسانه زفر وقال عليك كلام ما يصحش) المهم يا سيدي حلف برحمة ابنه أنوبيس انه …: قلتله أنوبيس مين؛ انت بتستعبط؟ أساسًا هو مش ابنك والإله حورس نام مع مراتك نفتيس وهي غفلتك وجابوا أنوبيس وكتبوه باسمك و انت عارف (أنت عارف طبعًا أن الموضوع دخل فيه زنا محارم و حاجة نجسة)”.

وتابع: “المهم يا سيدي كلمة مني لعنة منه في الآخر قلتله وديني لاحنط اللي جابوك وأجيبك في تابوت. قوم احنا الاتنين كنا لسه حنقوم على بعض وكان حيحصل عوق لقيت مين داخل علينا؟ الإله حورس. أه ورع زي ما بقولك كده. لقيت طبعا ست .. على روحه بقى وفلق على العالم السفلي (آلهة تخاف ما تختشيش يا عرايس يا اخويا)، جه الإله حورس ولفينا ورقتين بردي مع بعض واتكلمنا وبتاع وبجد وماليك عليا حلفان؛ طب وكتاب الموتى يا شيخ الإله حورس بيحبك آخر تلات أربع أهرامات وقالي إن لولا الملامة كان أعلن للناس أنك خليفته في الأرض وظل رمشه على أرض كمت لكنه خايف عليك من بحر الغدر وبتاع”. وواصل باسم يوسف: “المهم حلفني بايمانات آمون اني أبلغك الرسالة دي ونزل هو اخد ميكروباص على وادي الملوك عشان كان الدنيا ليلت وامه إيزيس مستنياه (كان عاملاله ملوخية بورق اللوتس تاكل صوابع رجلك وراها) المهم يعني أنت فاهم موضوع ست ده غلط. ده واحد مكار مالوش اَي تلاتين لازمة وبيلقح لعناته عليا. اذهب في سلام يا استاذ عرايس و تصحبك بركة أوزيريس إله الطالبية وآخر فيصل”.