أول تعليق من صيدليات سيف على التواطؤ مع “عامل دليفري” اعتدى على صيدلانية

علقت صيدليات سلسلة “سيف” على حادث تعدي أحد عمال الدليفري، على إحدى الصيدلانيات العاملات داخل السلسلة خلال الفترة الأخيرة، والذي تسبب في حالة ضغط كبيرة على السلسلة والتي اتهمتها الصيدلانية بعدم الدفاع عنها.

وقالت سلسلة سيف في بيان صحفي إنها ستكرم الصيدلانية ياسمين رشاد، والتي تعرضت للاعتداء في الحادث، وصدقت روايتها، وذلك بعد بيان سابق تسبب في هجوم متزايد على السلسلة المعروفة، حيث اكتفت بتحويل الصيدلانية للتحقيق وعدم الدفاع عنها فيما جرى لها.

وأكدت السلسلة تكريمها للصيدلانية وعودتها للعمل مرة أخرى، مع اتخاذ كافة الإجراءات القانونية ضد المعتدي عليها، والتأمين الأكبر لسلاسلها لعدم تعرض أي شخص للاعتداء.

بعد رفضهم الحضور.. مالك صيدليات 19011 يطالب بإعادة التحقيق في اتهامات “صيادلة القاهرة” (مستندات)

وفي وقت سابق، نشرت الصيدلانية ياسمين رشاد قائلة: “أنا اسمي ياسمين رشاد، دكتورة صيدلانية بشتغل في صيدلية سيف بقالي شهر الحقيقة إن الموضوع كان ماشي طبيعي جدًّا لحد ما في يوم الدليفري قرر يقل أدبه عليا، هحكيلكم الموضوع بدأ ازاي، زي أي صيدلانية في أي مكان عميلة طلبت مني حاجة تجميل ومفيش غير كان فى الصيدلية وماكنش عندي في الفرع وطلبت من الدليفري يروح يجيبه من فرع تاني ودي حاجه بتحصل في أي سلسلة”.

وأضافت : “الدليفري قالي لا مش هروح غير لو هوصله للعميل لكن مش هروح أجيبه هنا الصيدلية، الموضوع كان ماشي عادي وهو كان معترض عالموضوع وخلاص، تاني يوم بسأل مدير الفرع هو طبيعي إن دليفري يرفض يروح يجيبلي حاجة عميل طلبها من فرع جنبنا المدير سألني كذا مرة مين وأنا ماردتش أرد ولا أقول اسم الدليفري عشان مايتإذيش، ولكن الكلام وصل للدليفري بطريقة أو بأخرى وجه اتعصب عليا ف الصيدلية وحاولت أمتص غضبه لأني كنت عارفه انه أكيد تم لفت نظره بطريقة مش حلوة”.

وأردفت:”المهم الدليفري فضل يتوعدلي ويهددني ويقولي لو طلعت برة. الباب هعمل واعمل وراح واقفلى على باب الصيدلية وأنا عشان أوقفه عند حده خرجت وراه زعقتله وخبطتله على ظهر المتوسيكل بتاعه وقلتله انت مجنون ازاى تهددني فى قلب الصيدلية واللى هو عملت نفسي شبح أن مش خايفة من التهديد، بدأ يغلط ويشتم ويقول ألفاظ ماقدرش أقولها وكان هيضربني وقتها، فيه دكاترة جم من الصيدلية شافوا آخر مشهد فقط وأنا واقفة بزعق وماشافوش الغلط فيا ولا التهديد، قالولي ادخلي جوا ودكتور فيهم زعقلي وقالي ازاي تخبطيله على ظهر المتوسيكل دا انا لو حد خبطلي كده على كبوت عربيتي هطلع مي…….ين امه (اسفة. على الألفاظ بس لازم احكى الموقف بالتفصيل كأنكم النيابة )”.

وأكدت: “وبدأو يتعصبوا عليا وقالولي مالكيش دعوة بيه مع ان كان مفروض يسمعوا من كل الأطراف ويعرفوا اللي حصل بس هم مع بعض لسبب هم عارفينه كويس أوي وأقدر أثبته بتحليل رسمي ليهم كلهم، حاولت اتصل بإدارة سيف وطبعا ماحدش عبرني، الموضوع كبر والدليفري بره مش مبطل شتيمة وتهديد ومافيش حد ف الصيدلية واقف ف صفي قررت اتصل بالشرطه المساعد اللي كان شاهد عالوقعه قاللي أنا آسف أنا عندي بيت وعيال ومش هقدر أشهد معاكي ومشي!!”.

أول بلاغ للنائب العام ضد صيدليات 19011 بسبب إعلان رمضان (تفاصيل)

وأكملت: “الشرطة جت وكان في اتنين ظباط واحد فيهم اتكلم بحدة شديدة وعلَّى صوته عليا عشان ذكرت نقطة التحليل وفضل يقولي اخلصي قولي في ايه (معرفش انا بقيت فى حالة رهبة وانا المظلومة) بس الظابط التاني إللى كان معاه تكلم بلين وحاول يهديني، انا طبعا كنت منهارة مش قادرة اتكلم قولتلهم عاوزه اعمل محضر، الدليفري قال هعمل محضر انا كمان ومحضر قصاد محضر، كل اللي في الصيدلية فضلوا يقولولي هتباتي ف القسم بلاش فضلوا كتير يضغطوا على أعصابي ويخوفوني ويقولولي هتباتي ف القسم انتي كمان وهتتعرضي عالنيابة (بنت بقى وكدة وهتاخدي بالجزمة فى مصر لما تطلبي حقك)”.