أنتم مثيرون للشفقة.. معركة على “تويتر” بسبب حجاب نوارة نجم (صور)

اتهامات بالإنحلال والتمويل، واجهتها نوارة نجم، ابنه الشاعر الكبير الراحل أحمد فؤاد نجم، بجانب سيلًا من الانتقادات عقب نشرها صورة لها بعد قرار خلع الحجاب.

وبدأت نوارة في الرد على الهجوم الذي شنه العديد من مستخدمو موقع التواصل الاجتماعي “تويتر”، حيث قالت في البداية: “ما كنتش حارد بس حاضطر ارد دفاعا عن المحجبات مش عن شخصي..انا قالعة الحجاب من اكتر من سنة وكنت متوقعة حفلة لما الموضوع يتعرف بس الحقيقة توقعت يتقال كافرة او متآمرة ع الاسلام ما توقعتش ابدا ان يتقال “فلوس التمويل نضفتها وقلعت الحجاب!” هو الحجاب وساخة؟”.

وتابعت: “المعتاد ان لما واحدة ست تطل براسها في المجتمع القذر ده بيتم التعدي عليها باساليب رخيصة لها علاقة بانتهاك شخصها وكل واحدة فينا عارفة كده.. لكن عشان تهاجموا واحدة مختلفين معاها اذيتوا ملايين المحجبات واللي منهم امهاتكم واخواتكم ومراتاتكم وبناتكم لما ربطوا بين الثراء وخلع الحجاب”.

وأردفت: “مش حاطلع حد على وضعي المادي لان ده ما يخصش حد زمان كنت باعمل كده وقدمت بلاغ في نفسي لفحص مصادري المالية المعلنة والسرية ووكيل النيابة ضحك.. بس بطلت ادي حد مساحة مش حقه.. كويس انكم فاكريني غنية.. بس مش كويس انكم شايفين الحجاب بتاع الفقرا بس ومش كويس اصلا انكم محتقرين الفقرا، واكتر شيء مثير الشفقة لما ست تبقى منسحقة لفكر طبقي ذكوري متخلف وتبقى هي نفسها محجبة وهي نفسها تقول قبضت تمن خيانة مصر ونضفت وقلعت الحجاب.. يعني انت لابسة الحجاب فقر ولا وقلة حما؟ وازاي انت باصة لنفسك البصة دي ومتعايشة انت شخص حزين وبائس وصعبتي عليا”.

وقالت:”وانتوا طبعا ما بتفهموش عبارة “انا حرة” عشان انتم نفسكم مش احرار.. من جواكم انتم مش احرار.. وانا مش مهتمة افهمكم.. مهتمة اعرفكم بس قد ايه انتم مثيرين للشفقة، على اي حال الستات المحجبات تحديدا اللي قالوا “فلوس التمويل نضفتها” لو انتوا عايزين تقلعوا الحجاب وخايفين من المصروف اؤكد لكم ان الحجاب مكلف اكتر.. وفي كل الاحوال اذا مش عايزة تحترمي اي حد مختلف معاك على الاقل ما تحتقريش نفسك”.

وأختتمت:”عمر ما حد علق على واحد كان بدقن وحلقها او العكس او كان بجلابية وغيرها او حتى كان متدين والحد. عمر ما حد علق على شكل راجل او جسمه.. حق انتهاك الستات واقتحامهم ده انتوا جايبينه من انهي داهية والستات اللي بتظيط معاكم دول وضعهم ايه؟”.

وكان العديد من مستخدمو التواصل الاجتماعي قد انهالوا بالهجوم الشديد على نوارة نجم، الأمر الذي تحول إلى معركة إلكترونية، حيث تبادل المهاجمون توزيع الاتهامات على نجلة الشاعر الكبير الراحل، وكان أغلبها يتعلق بالتمويل الأجنبي، واتهام نوارة بالكسب غير المشروع.