سائق يقتل جاره بمقص في بولاق الدكرور.. وأقارب الضحية يروون التفاصيل (فيديو)
حالة من الحزن الشديد تسيطر على أسرة الشاب “محمود ع.م”، والذي لقي مصرعه على يد جاره بطعنة بمقص حديد في بولاق الدكرور.
وانتقل "القاهرة 24" إلى مسرح الجريمة لكشف كواليس الواقعة، والتقى أحد أقارب الشاب ويدعي محمد فتحي، حيث قال: "محمود كان شابا محترما جدا وأنا اللي مربيه، عمره ما غلط في حد أبدا، مات غدر على يد بلطجي بيشرب مخدرات وصايع، أنا عمري ما كنت متوقع أن محمود يموت بالطريقة دي على يد بلطجي زي ده".
وتابع: “محمود شاب مجتهد ومتعلم حصل ليه ظروف في حياته كانت صعبة بسببها ترك الدراسة، واهتم بالشغل أكتر علشان يعرف يصرف على أسرته ويصرف على نفسه، وأنا ندمان أني سبته فترة كبيرة وكنت بعيد عنه بسبب سفري خارج البلاد للبحث عن الرزق ندمان جدا”.
وأضاف محمد: “ محمود مات لسبب غير معروف بالنسبالي لأن مفيش حاجه في الدنيا تخلي واحد يطعن شاب بمقص في صدره ويموته غير لم يكون شارب حاجة، المخدرات هي السبب الوحيد في قتل محمود، وأنا مش هرتاح أبدا غير لم حق محمود يرجع حرام يموت بالطريقة دي، حرام جدا كان متفوق وكان في حاله والناس كلها بتشهد ليه بكدا والجنازة بتاعته كانت فيها ناس كتير من جميع المحافظات أكيد حب الناس ده مش من فراغ"، مطالبا بالقصاص من المتهم.
البداية، عندما تلقى قسم شرطة بولاق الدكرور، بلاغًا من الأهالي يُفيد بوقوع مشاجرة ومقتل شخص بطعنة في صدره بمقص حديدي، وعلى الفور انتقلت قوة من مباحث قسم بولاق الدكرور، وتبين صحة الواقعة.
وتم نقل المجني عليه إلى مشرحة زينهم تحت تصرف النيابة العامة، التي أمرت بتشريح الجثمان، للوقوف على أسباب الوفاة، وجاري اتخاذ الإجراءات القانونية.
