أبوجبل: لا أفهم سبب الهجوم عليا ومش محتاج حد يرجعني الزمالك.. وأشكر مرتضى منصور
كشف محمد أبو جبل حارس مرمى الزمالك السابق، عن أسباب رحيله عن الزمالك وعدم تجديد تعاقده، موضحا أن اللجنة السابقة برئاسة حسين لبيب رفضت تجديد عقده.
وقال أبو جبل في تصريحاته تلفزيونية: أنا يمكن عندي خيارات كتير الفترة دي، وأنا لجأت للقضاء مع نادي النصر وعندي عروض كتير من داخل وخارج مصر، وهبدأ النظر فيها لدراستها عشان خاطر ألحق وقت القيد.
وأضاف: ليه بتهاجم من الناس بالطريقة دي وليه بتهاجم من الرموز في الإعلام بالطريقة دي أنا عملت أيه عشان كدة؟، نادي الزمالك عمره ما قصر معايا وأنا عمري ما قصرت معاه، بس النقط اللي جمهور الزمالك زعلان مني فيها لازم يفهم كويس إن في حاجات بتحصل خارج عن إرادة أي حد.
وشدد: لما يبقى فاضلك 6 شهور في عقدك وانت اللي بتكلم الناس عشان تجدد، والناس ترد وتقولي إن انت مش في أولويات النادي، وألاقي الناس بتجدد للاعيبة تانية في الفرقة.
ووجه محمد أبو جبل حارس مرمى الزمالك السابق رسالة شكر إلى مرتضى منصور رئيس نادي الزمالك، قائلا: أوجه الشكر لسيادة المستشار مرتضى منصور، على الهواء، فلو كان في النادي من بدري، كنت جددت عقدي فهو ساعدني ووقف بجانبي في العديد من الفترات.
وأضاف: علاقتي جيدة بفيريرا، ومش مستني حد يقولي ارجع الزمالك، النادي ده بيتي وفضلت 6 سنين في النادي محدش سمع صوتي، وعمري ما اشتكيت النادي في فلوس.
ووجه رسالة خاصة لجمهور الزمالك قائلا: الجمهور على راسي من فوق، ومتأكد إني لما أتكلم وأوضح الأمور وأحكي بالمواقف الجمهور والنقاد مش هيغلطوني.
وأضاف: علاقتي كويسة بفيريرا وعلاقتي بعواد كويسة وعلاقتي بكل حراس مصر كويسة معنديش مشكلة مع أي حارس في مصر.
وختم حديثه قائلا: جمهور الزمالك ده اللي بنتعب عشانه وبنحتاج نفرحه والجمهور ده فوق رأسي.
