أنوشكا عن تقديم سيرتها الذاتية: نعمل سيرة مجدي يعقوب أفضل.. قصة حياتي فيها إيه عشان أقدمها؟
كشفت الفنانة أنوشكا، إمكانية تقديم سيرتها الذاتية في عمل فني، مؤكدة أنه يجب تقديم سيرة أشخاص خدموا الإنسانية مثل الدكتور مجدي يعقوب.
وقالت أنوشكا لـ القاهرة 24: ممكن نعمل قصة حياة مجدي يعقوب وناس بيخدموا الإنسانية، إنما قصة حياتي فيها إيه عشان أقدمها؟ ولكن ممكن نعمل قصة حياة صعود أو نجاح؛ لأن الناس بتقلدنا في حاجات وقصة حياتي مكنتش كلها نجاحات ورا بعض وفيه إخفاقات وتعب سنين.
وواصلت أنوشكا: أنا اتعلمت من الكبار وشوفت إزاي بيتعاملوا وياريتهم كانوا عايشين عشان ناخد بـ رأيهم، ومنهم سناء جميل اللي لسه بتوحشني القاعدة معاها، وأحنا لازم نهتم بالتعليقات والانتقادات عشان نصلح من نفسنا.
وسبق وكشفت أنوشكا عن رأيها في المهرجانات الشعبية، وقالت في تصريح سابق لـ القاهرة 24: أنا من أنصار الحرية وفي النهاية كل فنان بيقدم اللي شايفه مناسب لنفسه وبيئته، ومنقدرش نغفل المهرجانات الشعبية ولكن الأفضل أننا نمنح الفرصة لكل أنواع الغناء والموسيقى، زي ما فيه مهرجانات فيه كلاسيكي وعندنا مطربين مصريين على الساحة العالمية في فن الغناء الأوبرالي في غاية الجمال.
آخر أعمال أنوشكا
وعلى جانب آخر، قدمت أنوشكا العديد من الأعمال التي حققت نجاحا كبيرا، من بينهم مسلسل راجعين يا هوى بالتعاون مع العديد من الفنانين، أبرزهم خالد النبوي ونور النبوي، ووفاء عامر، وهنا شيحة ونور اللبنانية، وغيرهم من الفنانين.
