بشرى: النجوم الكبار احترموني وقدروني.. ونبيلة عبيد قدمتني للجمهور وحسيت أنها أمي
أعربت الفنانة بشرى عن امتنانها لمساعدة النجوم الكبار لها في بداية مشوارها الفني، مؤكدة أنها من الفنانات المحظوظات اللاتي تعاونَّ مع كبار النجوم، إلى جانب حديثها عن فضل الفنانة نبيلة عبيد عليها في بداية مشوارها.
وقالت بشرى، خلال ندوة تكريمها في القاهرة 24: أنا من أكتر الفنانات المحظوظات اللي اشتغلوا مع أهم النجوم والأسماء زي حسين فهمي وسميرة أحمد وعادل إمام ومحمود ياسين ويسرا سواء في التلفزيون أو السينما.
وتابعت بشرى متحدثة عن الفنانة نبيلة عبيد، قائلة: نبيلة عبيد دي نجمة كل القلوب ونجمة مصر الأولى وهي نجمة قلبي، لأن محدش قدمني كما قدمتني نبيلة عبيد وحسيت أنها أمي، وطلعوا عليا إشاعة أني قريبتها وفكروا إني بنت أختها في حين أن بنت أختها أميرة هاني كانت بتمثل معايا في المسلسل، وهي أخدت بايدي، وكذلك حسين فهمي قدمني واشتغلت معاه تلات أعمال، وعزت أبو عوف كان بيقف ورايا، وميرفت أمين.
وأضافت: أنا كنت محظوظة في احترام وتقدير النجوم الكبار، وكان مشهور على الثلاثي ميرفت ودلال عبد العزيز ورجاء الجداوي أنهم مش بيفوتوا الجنازات وبيقوموا بالواجب فكنت كل ما أروح عزاء ألاقيهم مع بعض، وكانت دايمًا رجاء تقول لي هاتي كرسيكي الرابع جمبنا علشان دايمًا بكون معاهم، روحت قلت لها أنا فين وانتم فين إحنا تلاميذكم، رديت عليا وقالت انتي مش محسوبة على الجيل الجديد.
واستكملت: الكلمة دي على الرغم من أنها جاية من حد عزيز على قلبي على قد على معناها كبير عليا، فالحمد لله الجيل القديم شايفني في مكانة عالية أوي، وعادل إمام ومحمود ياسين اتكلموا عليا في برامج، وسعيد صالح أشاد بيا على المسرح وما شفتش منهم غير كل خير كشابة جديدة طالعة وظاهرة بيقدموني وحابوني وكان أحيانا حد يقول إزاي بتشتغلي مع الفنانة دي لأن طبعها صعب.
واختتمت: أنا شفت كل حب ودعم، لذلك بعمل كده مع اللي بعدي من الشباب، والواحد لازم يفتكر كويس اتعمل معاه إيه ومينساش علشان تكمل المسيرة بشكل إيجابي، وعملنا كده مع الشباب الجداد في فيلم أولاد حريم كريم لأن كان عندهم فرصة للظهور مع نجوم كبار.
