قدرها 150 ألف جنيه.. أحمد العوضي عن مسابقة جمهوره: الظروف صعبة ودورنا نقف جنب بعض
كشف الفنان أحمد العوضي سبب تقديمه مسابقة جديدة لجمهوره، حيث أشار إلى أنه حرص على أن يساعد جمهوره، بعد أن تعاقد على مسلسله الجديد حق عرب، الذي ينافس به في الموسم الرمضاني 2024، مؤكدًا أنه يقدم هذه المسابقات كنوع من الشكر لجمهوره، لأنهم سبب نجاحه.
وتحدث أحمد العوضي، عن تفاصيل مسابقته الجديدة، خلال مداخلة هاتفية له، مع الزميلة منى عقبي، في بث مباشر عبر القاهرة 24، قال فيه: الناس طلبتها مني، ووعدت الجمهور أقدم مسابقة تانية، لأن أي حاجة حلوة بوصل لها بتكون بسبب الناس، ولما تعاقدت على مسلسلي الجديد حق عرب، اقترحت المسابقة على الجمهور إخواتي، وهنكسب 10 من إخواتي، كل واحد 15 ألف جنيه.
تفاصيل مسابقة أحمد العوضي
وأضاف أحمد العوضي: المسابقة هي مشاركة مجتمعية، وأنا عايز أرد الجميل لهم لأن كلنا إيد واحدة، والدنيا صعبة على الناس كلها، اللي معاه يدي اللي مش معاه، أنا بنجح عشان الناس بيحبوني وبيتفرجوا علي، زي ما أنا بتراضى هما بيراضوني، وبنختار الفائزين بشكل عشوائي، ومينفعش حد يبعت يقولي والنبي كسبني.
أما عن تعليقات البعض، بشأن تقديمه هذه الأموال لمؤسسات خيرية، بدلًا من تقديمه لمسابقات، فقال: أنت متعرفش أنا بعمل إيه في الخفاء، دي مسابقة مش صدقة، لما حد بيشترك في مَن سيربح المليون كدة بياخد صدقة؟، لما أدخل برنامج وأكسب يبقا باخد صدقة؟!.. الظروف صعبة، وإحنا دورنا نقف جنب بعض، الدولة تتحرك من جهة، وإحنا من جهة، لو حطينا إيدنا في إيد بعض هنكون في حتة تانية إن شاء الله.
