إيناس الدغيدي: بعدت 14 سنة عن الإخراج بسبب التزمت الفكري.. ومش هستنى نجم يقولي تعالي أخرجيلي
عبرت المخرجة إيناس الدغيدي عن قصة حبها لزوجها رغم اختلاف ديانته، وعن سبب ابتعادها عن الإخراج لمدة 14 سنة، وعن رأيها في موسم الرياض.
وقالت إيناس الدغيدي في برنامج أسرار التي تقدمه الإعلامية أميرة بدر على قناة النهار: اتجوزت اللي حبيته وقصة حب 9 سنين وتحديت كل حاجة حتى الدين وكان مسيحي وأسلم عشاني، ودخلت السينما، وكانوا رافضين عشان الديانة ووالدي كان استاذ تربية دينية ولغة عربية، مقابلش جوزي لأنه مات بعد زواجي بسنة، وقال مش هقابله عشان أغير دينه ومدخلش بيتنا غير في جنازة أبويا، ومعملتش فرح، عملته في بيتي، وكان عندي بيتي قبل ما اتجوز ومستقلة.
وأضافت إيناس: أنا واحدة ربنا خلقها عكس الناس، ومش قاصدة لكن أنا من طفولتي كده، إحنا 8 أخوات أنا عكسهم دايما وعلاقتي بيهم حلوة ووالدي توفى راضي عني، ولما بقيت مخرجة قال أنا اللي شجعتها، ووعدته أن التمثيل لا، وأنا دخلت كل الفن بالصدفة، ولا كنت أعرف يعني إيه فن، وحبيت زوجي لحد النهاردة، وعلاقتنا مش بس جواز هي حياة وكان دايما ورايا أكون مخرجة، وانفصلنا قبل وفاته، ابتدى يغير مني لما كبرنا، وسيبنا بعض بشياكة، لأن الحياة لوحدك أحلى بكتير، وكل واحد بيبقى له حياته.
المخرجة إيناس الدغيدي: حصل تزمت فكري في مصر وده سبب ابتعادي 14 سنة لانهم مش عايزين واحد زيي تتكلم
وتحدثت إيناس الدغيدي عن رأيها فيما يحدث بموسم الرياض قائلة: موسم الرياض فايدة للسينما المصرية بلا شك، وهيضيفوا للسينما بالإمكانيات دي، لكن لغاية دلوقتي مشفتش مستوى كويس، وكل الأعمال سطحية، وأنا مش من انصار حرق النجوم بالشكل ده، مينفعش أحط في عمل 5 أو 6 نجوم مع بعض، لأن النجم لازم يفضل نجم، وهو إبهار مالوش فايدة، لازم الفنان يبقى عزيز، ولو اتعرض عليا أعمل كل ده هعمله بس بشكل كويس، طالما هيدوني إمكانيات ويحققوا طموحاتي، ليه أقدم حاجة وحشة، ليه أروح عشان الفلوس وأنسى اسمي ومكانتي، بس مقابل ده أدي كواليتي، ومفيش جوه الإبهار حاجة، وآخر مرة شوفت المطربين بيقروا من ورقة، ومكلفوش نفسهم يحفظوا أغانيهم.
واستكملت حديثها: حصل تزمت فكري في مصر وده سبب ابتعادي 14 سنة، لأنهم مش عايزين واحدة زي إيناس الدغيدي تتكلم، وعندي مشاريع زي الصمت وعصر الحريم ومن 8 سنين، بيتكلم عن الجواري في مصر، وموضوعه يجنن وقد إيه المرأة المصرية من 1800 بتدافع عن حقوقها، ولما أرجع كله يترصد لي ويشوفوا هل هي لسة إيناس الدغيدي ولا خلاص راحت عليها، وإزاي اشتغل مسلسل استلم منه حلقتين وباقي الـ 30 حلقة استلمهم على الهوا، طيب أخرج إزاي، مش هستنى لما نجم يقول عايز إيناس الدغيدي تيجي تخرجلي، عمري ما عملت كدة مع أكبر النجوم، ومطلبتش من نجيب ينتجلي رغم أنه صديقي، لأن الفنان لازم يبقى عنده كرامة، وأنا عندي مواضيع وهما عايزين حاجات لايت أنا مبشتغلهاش، واللي عايزني يكلمني.
برنامج أسرار
برنامج أسرار تقدمه الإعلامية أميرة بدر على شاشة النهار يوميا خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
