الفنان صبري عبد المنعم: شوفت العدرا وسيدنا النبي.. ولما رحت له المدينة قابلني بالكرامات
حل الفنان القدير صبري عبد المنعم ضيفا في حلقة جديدة من برنامج (كلم ربنا مع احمد الخطيب) على الراديو 9090.
وروى عبد المنعم تفاصيل مواقف عديدة في حياته لا ينساها، وكشف عن علاقته الوثيقة بالله والرؤى التي يراها بين الحين والآخر ورؤيته للنبي صلي الله عليه وسلم.
وقال الفنان الكبير: أنا شفت العدرا وكلمتها وكلمتني.. وشفت رُسل وأنبياء وصالحين بعيني.. وشفت حضرة سيدنا النبي كتير جدا الحمد لله.. ولما رحت له المدينة وزرت الكعبة الشريفة شاهدت من النور والكرامات والنفحات التي تسعد أي إنسان.
وأضاف ربنا سندي في كل حياتي وفي شدتي وفي كل لحظة صعبة.. وأنا اتعرضت في حياتي لمواقف أصعب من بعض، ومعرفش لحد النهاردة عديت منها إزاي.
وتابع الفنان صبري عبد المنعم حديثه قائلا: أكتر موقف كلمت فيه ربنا وناجيته بالدموع لما أبويا أصر يدخلني ثانوي فني وأنا كنت عاوز أدخل ثانوي عام، علشان أروح معهد فنون مسرحية، ويشاء ربنا إني وأنا داخل المدرسة الثانوية الميكانيكية ألاقي قاعة اسمها (المسرح المدرسي) وبيجيبوا لنا أساتذة وخريجين من معهد الفنون المسرحية علشان يدربونا ويعلمونا مسرح، والحمد لله ربنا راضاني وأوجد لي الشيء اللي انا بحبه في المكان اللي مكنتش عاوز أروحه، وبعدها ذاكرت ثانوية عامة علشان أدخل المعهد.. ووقتها بكيت بكاء شديد ومازلت بقول في كل دعاء وبعد كل صلاة.. علمك بحالي يُغني عن سؤالي.
