ميس حمدان: عايزه أجسد نوال السعداوي.. وجالي اكتئاب بسبب قلة أعمالي
حلت الفنانة ميس حمدان، ضيفة على الإعلامية إنجي علي في نجوم FM، وتحدثت خلال اللقاء عن إصابتها بالاكتئاب خلال الفترة الماضية بسبب قلة أعمالها الفنية، وكشفت عن الشخصية التي تتمنى تجسيدها في عمل فني.
قالت ميس حمدان: لو ممكن أجسد شخصية لازم تكون شخصية شائكة مش كل الناس متفقة عليها، زي نوال السعداوي، بغض النظر عن إن ناس كتير مش متفقين مع أفكارها وطريقتها، مع احترامي لكل القامات الكبيرة، مش عايزه أجسد سعاد حسني مثلا، لأنها محبوبة عند كل الناس، أنا عايزه شخصية جدلية.
وأردفت: فيلم عمر وسلمى كان المحطة الأساسية وقدمتني للناس بشكل لائق ودور كبير وحلو، والفيلم نجح نجاح باهر.
وأكملت: رفضت أفلام كتير بعد عمر وسلمى معرفش كنت فاكرة نفسي مين، كان لازم أستغل المرحلة دي أحسن، لكن كانت خبرتي قليلة.
وأضافت: ليه تلومني إن عندي مواهب كتير؟ كان عندنا ولغاية دلوقتي فنانين بيغنوا ويمثلوا، دنيا سمير غانم حبيبة قلبي متألقة، وتامر حسني بيغني ويمثل، وروبي بتغني وتمثل.
- لفترة طويلة زمان كان عندي اكتئاب وتخطيته الحمد لله، وفقدت ثقتي في نفسي، لكن لما قعدت مع نفسي سنين في سكينة وهدوء عرف إنه مش سوء حظ في الفن، وإنه لسه الوقت مش وقتي.
وذكرت: ناس كتير بتقول إزاي واحدة زيك مش نجمة مصر والوطن العربي الأولى، وزمان مكانش عندي رد، دلوقتي ردي إنه مش وقتي، ويمكن ربنا كاتب النجاح في حتة تانية.
وتابعت: أنا بحب التقمص، وتقليد الفنانين كان فقرة جميلة في حياتي أشكر ربنا عليها وعلت قيمتي عند الناس.
وأشارت إلى لرغبتها في إعادة اكتشاف نفسها قائلة: بعد غياب 7 سنين عن الفن، كان عندي رغبة متوحشة أعيد تقديم ميس حمدان بشكل مختلف حتى في شكلي.
