الولد مريض ومحتاج جلسات تنفس.. سيدة تستغيث من خطف طليقها لصغيرها: ضربني وخطف ابني في جلسة الرؤية | خاص
استغاثت سيدة تدعى نورهان أحمد محمد، تقيم في منطقة عين شمس، بالجهات المعنية، متهمة طليقها باختطاف ابنها البالغ من العمر سنتين ونصف، والذي يعاني من مشاكل صحية، ويحتاج لجلسات تنفس صناعي بشكل دوري.
سيدة تستغيث من خطف طليقها لصغيرها: ضربني وخطف ابني
وقالت نورهان أحمد محمد، والدة الصغير سليم، في تصريحات خاصة لـ القاهرة 24: أنا مش محتاجة أي حاجة غير إن ابني يرجع لحضني، سليم مريض وبيحتاج جلسات تنفس باستمرار، وبيعاني من مشاكل صحية، وطليقي خطفه مني وإحنا بنفذ حكم الرؤية في مركز شباب عين شمس في 9 مايو الجاري بمساعدة شقيقه، وتعدى عليا بالضرب أنا ووالدي وخالي في جلسة سابقة، وتم تحرير محضر بالواقعة.
وأردفت نورهان أحمد محمد، والدة الصغير سليم: أنا معرفش أي حاجة عن ابني وخاصة إن أهل زوجي منفصلين عن بعض ومعرفش هما فين، ولما روحت القسم وحررت محضر وبعتوا معايا إتنين من الأمن لبيت طليقي ولما راحوا البيت ملقوش حد هناك والشقة كانت فاضية حتى العفش مش موجود.
وأكملت والدة الصغير سليم عزت: أنا نفسي صوتي يوصل عشان أنقذ ابني لأنه مريض وبيتعالج من مشاكل في التنفس، ولما كنت بسيبه وأنزل ساعة قبل ما أبوه يخطفه عشان أتابع القضايا والمحاضر، كنت ألاقيه بيرجع وتعبان بسبب حساسية الصدر، وأنا محررة ضد طليقي وأخوه أكتر من محضر لأنهم تعدوا عليا بالضرب خلال تنفيذ حكم الرؤية، وفي أول جلسة، وتاني جلسة كان معاه جاردات، والجلسة التالتة كان شايل سلاح.
