مصطفى حدوتة: عمرو دياب بيعطش جمهوره.. وعودته مع عمرو مصطفى تفرح أي حد بيحبه
علق الشاعر الغنائي مصطفى حدوتة على عودة تعاون الفنان عمرو دياب، والملحن عمرو مصطفى، في ألبوم الهضبة الجديد ابتدينا، والذي شارك فيه حدوتة بأغنية قفلتي اللعبة.
وقال مصطفى حدوتة في لقائه مع القاهرة 24: هما مع بعض قدموا لينا أغاني كتير أوي اتبسطنا بيها بصراحة وأغانيهم في ذهننا وقلبنا وعايشة معانا، ورجوع تعاونهم مع بعض يفرح أي حد بيحب عمرو دياب أو بيحب عمرو مصطفى، والجمهور اتبسط بعودة تعاونهم وبيقولهم يلا اشتغلوا وأعملوا لينا أغاني تاني.
مصطفى حدوتة يتحدث عن مشاركته في ألبوم عمرو دياب
كما تحدث حدوتة عن مشاركته في ألبوم الهضبة عمرو دياب الجديد قائلًا: بتبسط في كل مرة بشتغل مع الهضبة عمرو دياب وكل مرة بتكلم معاه وكل مرة بسمعه فيها، مش فكرة النجاح مضمون مع عمرو دياب، ولكن هو بيعطش جمهوره أوي علشان الألبوم كله ينزل ويتسمع كله.
وأضاف: الفكرة في المنافسة وأن إزاي تبقى الأنجح وأغنيتك تبقى ملفتة في الألبوم، زي أغنية يا قمر كانت الأغنية الوحيدة اللي تفوقت على الكل بتوفيق ربنا بعد المجهود، والفكرة لما تنجح تبقى الأنجح.
مصطفى حدوتة وعمرو دياب
وتعتبر أغنية قفلتي اللعبة، ثاني تعاون يجمع الهضبة عمرو دياب والشاعر الغنائي مصطفى حدوتة، وذلك بعد النجاح الكبير الذي حققته أغنية يا قمر، والتي كانت أولى تعاونتهما.
