علي قدورة: موهبة الصوت من عند ربنا وهستخدمه بما يرضي الله.. وبحلم أسجل القرآن الكريم
كشف مؤدي المهرجانات الشعبية المعتزل علي قدورة، إمكانية اتجاهه للإنشاد الديني بعد اعتزاله الغناء، موضحًا أن حرمانية الأغاني تكمن في الموسيقى على حد تعبيره، مؤكدًا أنه سيتجه للإنشاد دون موسيقى بوجه عام وليس للإنشاد الديني فقط، بجانب الكشف عن أمنيته بتسجيل القرآن الكريم بصوته.
وقال علي قدورة، في تصريح خاص لـ القاهرة 24: موهبة الصوت من عند ربنا وأنا هستخدمه فيما يرضي الله، ولكن مش الإنشاد الديني بعينه ممكن أنشد للنجاح والكفاح مش شرط ديني ومش عايز اتحصر في الجزء الديني، وحتة التحريم في الموسيقى لأنها بتحرك المشاعر، وأنا بستخدم الأصوات البشرية أعمل بيها أرضية بتاعة الموسيقى وده مش حرام وأنا سألت فيها.
كما كشف علي قدورة، عن أمنيته في تسجيل القرآن الكريم بصوته، قائلًا: بحلم أني أسجل القرآن الكريم بصوتي، ولكن بعد ما أتعلم أحكام التجويد كويس.
علي قدورة يعلق على انتقادات حذف الأغاني
وعلق علي قدورة، على انتقادات حذف الأغاني، قائلًا: أنا حذفت اللي أقدر عليه من الأغاني بتاعتي، وفي عدد من الشركات متقبلتش الموضوع، وفي فنانين كتير مش عارفين ولا مقتنعين أن الأغاني حرام، وأي حد بيغني مش هيقتنع أن الأغاني حرام وإلا مكنش غنى، الحلال بيّن والحرام بيّن.
وتابع علي قدورة: اللي بيهاجم حذف الأغاني كارثة ولكن إحنا مش هنمسك لسان الناس وفي يوم الحساب هنعرف إيه اللي لينا واللي علينا، ولا اللي دخل جامع عاجب ولا اللي دخل خمارة عاجب، الناس اتكلمت على ربنا والرسول مش هيتكلموا على بني آدمين؟، الواحد بيرضي رب الناس مش الناس.
