مصطفى حدوتة: فخور بتعاوني مع أصالة.. وأغنيتي الأحلى في ألبومها الجديد
تحدث الشاعر الغنائي مصطفى حدوتة، عن تعاونه الأول مع المطربة السورية أصالة نصري، بـ أغنية عندي اكتفاء في ألبومها الجديد ضريبة البُعد.
وقال مصطفى حدوتة، في لقائه مع القاهرة 24: أصالة صوتها جبار واللي يسمعها يتسلطن بيها ويتبسط وأنا متربي على أغانيها، وفخور بنفسي إني اشتغلت مع أصالة، وأغنيتي في ألبوم أصالة مختلفة عن كل الألبوم وأكتر أغنية متعوب عليها وباين الشغل فيها.
وتابع مصطفى حدوتة: أنا بتكلم كمستمع بسيط مش أني شاعر، والأغنية دي أحلى أغنية في الألبوم، وأصالة نفسها قالت أن دي أحلى أغنية في الألبوم وبشهادة كل اللي اشتغلوا فيه.
مصطفى حدوتة يكشف تفاصيل تعاونه مع الهضبة عمرو دياب في ألبومه الجديد
كما كشف مصطفى حدوتة، تفاصيل تعاونه مع الهضبة عمرو دياب، في ألبومه الجديد ابتدينا، قائلًا: بتبسط في كل مرة بشتغل مع الهضبة عمرو دياب وكل مرة بتكلم معاه وكل مرة بسمعه فيها، مش فكرة النجاح مضمون مع عمرو دياب، ولكن هو بيعطش جمهوره أوي علشان الألبوم كله ينزل ويتسمع كله، والفكرة في المنافسة وأن إزاي تبقى الأنجح وأغنيتك تبقى ملفتة في الألبوم، زي أغنية يا قمر كانت الأغنية الوحيدة اللي تفوقت على الكل بتوفيق ربنا بعد المجهود، والفكرة لما تنجح تبقى الأنجح.
