مصطفى حدوتة: كتبت أغنية هتجيلي قبل أزمة محمد رمضان وياسمين صبري.. ولكنه ذكي بيستثمر المواقف
كشف الشاعر الغنائي مصطفى حدوتة، تفاصيل أغنية هتجيلي، موضحًا أنه كتب كلمات الأغنية قبل أزمة الفنان محمد رمضان والفنانة ياسمين صبري، مؤكدًا أنه لم يكتب الأغنية خصيصًا لهذه الأزمة.
وقال مصطفى حدوتة في لقائه مع القاهرة 24: وأنا بشتغل وبكتب أغاني محمد رمضان مبفكرش في حياته الشخصية، وطبعًا مبكتبش على المواقف اللي بيتعرض لها، ولو أنا بكتب اللي يليق على محمد رمضان بس مش هنجح، أنا دلوقتي لو بكتب اللي حاسه بس مش هنجح لأنه مش شرط يكون كل الناس بتحسه.
وتابع مصطفى حدوتة: أنا عملت أغنية اسمها هتجيلي لـ محمد رمضان، هو كان عامل اللحن وبعتهولي من بدري وبعدين كتبت الأغنية وعجبته جدًا، هو ذكي جدًا وبيعرف يستغل الموقف، الفيديو بقى رفاعي الدسوقي وتمارا بعد موقف السحور في رمضان بيومين الناس ربطت الاتنين، ده ذكاء من محمد رمضان.
وأضاف مصطفى حدوتة: أكيد أنا مش بكتب على رفاعي الدسوقي وتمارا، أنا كنت كاتب الأغنية من بدري وهو بيعرف يستغل المواقف وده دليل على اللي بقوله إن هو بيعرف يستثمر الموقف واللحظة ومبيضيعش فرصة.
مصطفى حدوتة: مفيش فنان النجاح معاه مضمون حتى محمد رمضان
وكان علق حدوتة على فكرة ضمان النجاح رفقة فنان معين، أضاف: مفيش فنان النجاح معاه مضمون حتى محمد رمضان، أنا عندي أغاني مع محمد رمضان منجحتش أو الناس متفقتش معاها، وعندي أغاني نجحت وفي غيرها نجاحها محدود، أنا بالنسبة ليا النجاح يعني بتسمع أغنية في كل حتة وكل وقت.
