إحنا مش أقل من حد.. ممرضو الأجر اليومي بمستشفيات قنا الجامعية يستغيثون: بنشتغل أكتر وحقوقنا صفر
“إحنا بنشتغل أكتر من الممرضين المثبتين، وبنشيل شفتات كاملة، لكن مش واخدين أي حق من حقوقنا.. لا تأمين صحي، لا وجبات، لا سكن، ولا حتى إجازة نرتاح فيها يومين”، هكذا بدأ عدد من الممرضين العاملين بالأجر اليومي في مستشفيات قنا الجامعية شكواهم، بعدما طفح بهم الكيل من التفرقة في المعاملة، رغم قيامهم بنفس الدور داخل أقسام المستشفى المختلفة، من طوارئ لغرف عمليات ورعاية مركزة.
استغاثة من الممرضين المؤقتين بمستشفى قنا الجامعي
وأضافوا لـ القاهرة 24: نعمل أكثر من زملائنا المثبتين، حيث نؤدي 20 يوم عمل في الشهر مقابل 15 فقط للمثبتين، ومع ذلك لا نحصل على وجبات، ولا سكن، ولا إجازات، ولا تأمين صحي، ولا حتى مكافآت.
وتابعوا: نحن خريجو معاهد خاصة، ولسنا معينين، ونتحمل “شفتات” يومية شاقة دون أدنى ضمانات أو تقدير، في مخالفة صريحة لقانون العمل ولوائح المستشفيات الجامعية.
الممرضون أوضحوا أنهم خريجو معاهد تمريض خاصة، واشتغلوا على أمل التثبيت أو على الأقل التقدير، لكن الواقع طلع غير كده، مردفين: بنشيل الشغل كله، وبنشتغل زي أي حد، بس مفيش مقابل ولا حتى أمل في بكرة.. حسسونا إننا مالناش قيمة.
واختتموا رسالتهم بمناشدة صريحة لإدارة مستشفيات قنا الجامعية: إحنا مش جايين نطلب تفضل.. إحنا بنطلب حقنا المشروع.. شوفونا زي زملائنا، وادونا على الأقل الحد الأدنى من اللي بنستحقه.
