خد الموبايل وجري ولسه بدفع أقساطه.. سيدة تستغيث بعد سرقة سائق تطبيق نقل ذكي لهاتفها| خاص
كشفت سيدة تعرضها لسرقة هاتفها من سائق شركة أوبر للنقل الذكي خلال استقلالها رحلة إلى مدينة نصر، عندما كانت تحضر للسائق ثمن الرحلة من حقيبتها، لكنه تحرك سريعا بالسيارة، وأغلق الهاتف.
سيدة تستغيث بعد سرقة هاتفها من سائق تطبيق نقل ذكي
وقالت في تصريحات خاصة لـ القاهرة 24: اللي حصل معايا حادثة غريبة جدًا، كنت رايحة لصاحبتي من مساكن الشروق لشارع النادي الأهلي وطلبت سائق من تطبيق توصيل أوبر عادي وكانت الساعة 12 ظهرًا وبالفعل ركبت معاه العربية ولما نزلت كان معايا شنطتين ولسه بطلع له فلوس الرحلة وهبدأ اتحرك من العربية وموبايلي جنبي، اتفاجئت أنه طلع جري بالعربية طبعا فضلت أنادي عليه وأقوله استنى نسيت الموبايل قد كده مفيش فايدة، ولما رنيت عالتليفون كان قافله.
وتابعت: حاولنا نتصل كتير بالسواق بس قفل التليفون وعملت محضر، الحمد لله إني كنت فاكرة لون العربية وأول 3 حروف منها والموديل بتاعها، وروحت القسم وكملت محضر وخدوا مني البيانات كلها، والموبايل لسه جديد ولسه بدفع في أقساطه واقف عليا بـ 15 الف جنية ولسه مكملش معايا 8 شهور كنت في حالة صادمة ولازم الناس تعرف أن شركة أوبر مش آمنة على العملاء لأنهم بيختاروا سواقين دون المستوى، وكلمت شركة أوبر والمفروض هروحلهم بكرة الصبح عشان اشوف هعمل إيه معاهم.
