آدم الشرقاوي يكشف تفاصيل أزمته النفسية بسبب التعليقات السلبية: غلطت لما ربطت الاكتئاب بمصر
كشف الفنان آدم الشرقاوي، تفاصيل الأزمة الصحية والنفسية التي مر بها خلال العامين الماضيين، موضحًا أنه دخل في مرحلة اكتئاب بسبب التعليقات السلبية عبر مواقع التواصل الاجتماعي.
وقال آدم الشرقاوي، خلال حواره مع الإعلامية منى الشاذلي، في برنامجها معكم: بعد ما خلصت فيلم شماريخ دخلت في اكتئاب لأني مكنتش واثق في نفسي ولا كنت شايف نفسي ممثل شاطر، وكنت بشوف بوستات على السوشيال ميديا إن العربي بتاعي مش مظبوط، فقلت هو أنا ينفع أمثل ولا لأ؟، أنا كنت عايز أستقر في مصر خاصة أن أهلي كانوا برا ومعرفش حد هنا غير الفريق بتاعي اللي بشتغل معاه، كنت محتاج صحاب وأهلي، كنت وحيد وحواليا ناس محبطة، كنت محتاج شلتي اللي بشوفهم وبقعد معاهم كل يوم.
وتابع آدم الشرقاوي: مشكلة الكلى ظهرت قبل ده بكتير ولكني مكنتش عارف، قعدت فترة وزني بينزل وبيزيد بسرعة، فأنا مكنتش فاهم ليه ولكني كنت بنزل جيم ولقيت جسمي مليان ماية ووزني مش راضي ينزل، وبعدين دخلت مرحلة الاكتئاب، مكنتش بشوف الناس ولا الشمس أصلًا، كانت الناس بتكلمني وقت إعلان شماريخ وأنا مش سامعهم أصلًا وذهني كان مشوش، والتليفون كان مأثر عليا، مينفعش إنسان يعيش كده لازم ننزل ونشوف الناس والحياة مش التليفون بس.
وعن إمكانية طلب المساعد مِن مَن حوله، علق آدم الشرقاوي: مقولتش لحد على اللي بيحصلي علشان ميقولوش عليا ضعيف أو يقولوا إني مبعرفش أحل مشاكلي، أنا عنيد ومعرفتش أسأل حد يساعدني، في حاجة فيا أنا مش فاهمها ومكنتش عايز أعرف حد أن في حاجة غلط فيا لأني مكنتش عايز دي تأثر على شغلي وده تفكير غلط، معرفتش أقول لأي حد ساعدوني، كنت بفكر أني أنا اللي عملت كده في نفسي.
آدم الشرقاوي: رفضت عروض شغل بسبب كلام الناس
كما أوضح آدم الشرقاوي، أنه رفض العديد من عروض التمثيل بسبب التعليقات السلبية، قائلًا: رفضت عروض شغل لأني كنت شايف أني مش ممثل شاطر خالص بسبب كلام الناس، ولما كنت ببص لنفسي في المرايا مش عارف البني آدم ده، مكنتش عارف أفكر صح وكل أفكاري كانت سلبية، ولما كانوا بيكلموني على شغل مكنتش برد ولو رديت كنت ببقى عصبي جدًا بدون سبب، ورفضت لأني مكنتش قادر ولا عارف أمثل أصلًا.
وواصل: كنت عايز أبني حياة هنا، وكنت بفكر أن محدش عايز يبقى صاحبي ولا يقعد معايا، ده دخلني في اكتئاب، وفي ناس حاولوا يساعدوني ويوصلوني لدكتور نفسي، ولكني مكنتش سامع ولا شايف أني محتاج أصلًا، بس كلنا محتاجين دكتور نفسي.
آدم الشرقاوي: النجاة بالنسبة ليا لما شفت أمي
وأضاف: أوحش مرحلة كنت 115 كيلو، النجاة بالنسبة ليا أول ما شفت أمي في أمريكا، هي شافت أن في حاجة غلط ولكن مكنتش بتحكم ولا بتلومني، كانت بس بتشجعني، رحت لدكتور وخدت أدوية وبدأت أخف وأخس، ولكن مخي كان بايظ ومش فاكر في نفسي، ربطت إحساس الاكتئاب بمصر وده كان غلط، أنا اللي عملت كل ده وخليت ناس تأثر على تفكيري.
واختتم آدم الشرقاوي: التعليقات السلبية كانت بتأثر عليا وكنت متخيل أنها هتخليني مشتغلش أو أقعد في البيت، أنا الحمد لله عملت حاجات كتير وتعبت علشان أوصل للي كنت فيه، ومكنش المفروض أركز في التعليقات السلبية، أنا كنت محتاج أهلي وأصحابي، ممكن أكون كنت بدور على أصحاب في أماكن غلط.
