كارمن سليمان: حفل شيرين عبد الوهاب في موازين من أنجح حفلات المهرجان.. وأتمنى تجمعني بيها أغنية
علقت الفنانة كارمن سليمان، على جدل حفل الفنانة شيرين عبد الوهاب في ختام مهرجان موازين، خاصة وأن كارمن افتتحت المهرجان وحققت نجاحًا كبيرًا لدى الشعب المغربي، موجهة رسالة دعم لشيرين ومعلقة على إمكانية تعاونهما مستقبلًا.
وقالت كارمن سليمان، في لقائها مع القاهرة 24: مبسوطة جدًا بنجاح الحفلة بتاعتي في مهرجان موازين وفخورة أني افتتحت مهرجان عالمي زي موازين، شيرين عبد الوهاب مش فنانة أتكلم عليها كلمتين، هي فنانة كبيرة جدًا، وليها تاريخ كبير أوي أنا بحبها أوي، وأنا شايفة أن حفلتها في مهرجان موازين ناجحة جدًا.
كارمن سليمان: أتمنى تجمعني أغنية مع شيرين عبد الوهاب
وأضافت كارمن سليمان: أنا معرفش إيه اللي حصل في الحفلة نفسها ولكن الفيديوهات اللي شفتها أظهرت أن الحفلة كانت من أنجح الحفلات اللي اتعملت في مهرجان موازين، وياريت طبعًا يكون في بينا تعاون خلال الفترة اللي جاية هبقى مبسوطة جدًا.
كارمن سليمان
ومن ناحية أخرى، كانت تحدثت الفنانة كارمن سليمان، خلال لقائها مع القاهرة 24، على ألبومها الجديد أصح غلطة، قائلة: بقالي سنين بنزل أغاني سينجل، وخطوة الألبوم مكنتش سهلة خالص، كانت محتاجة وقت ومجهود واختيارات كتير وتفكير كتير علشان الألبوم يكون حاجة على بعضها حلوة، خطوة سعيدة بيها جدًا وكانت خطوة شايفة أنها متأخرة ولكن كل تأخيرة وفيها خيرة، وكل حاجة هتبدأ فعلًا من هنا، وبقيت حابة أني أعمل ألبومات على طول، وبنزل أغاني الألبوم على أيام متفرقة لأني متعودة على الأغاني السينجل، فحبيت أن الألبوم مينزلش على بعض كله علشان مفيش أغنية الناس تغفل عنها.
