تكلفة الحقنة 2.5 مليون دولار.. والدة صغيرين بالفيوم تستغيث لعلاجهما من مرض ضمور العضلات دوشين
تعيش والدة صغيرين من محافظة الفيوم، على أمل علاجهما من مرض ضمور العضلات دوشين، حيث استغاثت والدة الصغيرين مالك ويونس محمد خالد عويس جنيدي، بضرورة فتح حسابات تابعة لوزارة التضامن الاجتماعي لجمع تبرعات تكلفة علاجها من مرض ضمور العضلات.
والدة صغيرين بالفيوم تستغيث لعلاجهما من مرض ضمور العضلات دوشين
وقالت آية جمال محمد، والدة الصغيرين، في تصريحات خاصة لـ القاهرة 24: مالك عنده 7 سنوات ويونس 3 سنوات، واكتشفت إصابتهما بمرض ضمور العضلات من 5 أشهر، مالك ظهرت عليه الأعراض في الأول وكان بيمشي ببطء، ومش بيقدر يطلع السلم ولا بيلعب ويجري زي صحابه، وأي حركة بتألمه وساقه أصبحت كبيرة شوية عن طبيعة أي طفل في عمره.
وأضافت: كشفت على مالك ونتيجة التحاليل أظهرت أنه مريض ضمور عضلات، ويونس بدأت تظهر عليه أعراض مشابهة لأخيه ومنها إنه حركته كانت ضعيفة، وعملت له تحليل جيني، وفعلًا نتيجة التحليل كشفت أنه بيعاني من نفس طفرة مرض أخوه.
وواصلت: أنا بناشد بضرورة فتح حساب بوزارة التضامن الاجتماعي، لجمع التبرعات وعلاجهم، لأن هما محتاجين حقنة نهائية للقضاء على المرض اسمها إيليفيديس، تكلفتها حوالي 2 ونصف مليون دولار.
واستكملت والدة الصغيرين مالك ويونس خالد جنيدي: علاج ولادي غالي جدًا وفوق مقدرة أي إنسان يتحملها لوحده، ومحتاجة افتح حساب في التضامن الاجتماعي واجمع تبرعات لأولادي والناس الخيرة تقف جمبي أو حد يتبنى حالتهما، لأن لازم ياخدوا الحقنة في عمر صغير، هما دلوقتي بيمشوا لكن مع الوقت حركتهم بتكون صعبة وبطيئة.
