نادية مصطفى: مبقيناش نتوقع النجاح زي زمان.. نفسي أقدم جديد ولكن غصب عني
تحدثت الفنانة نادية مصطفى، عن قلة أعمالها الفنية خلال الفترة الأخيرة، إذ إن آخر أغنية طرحتها كانت أغنية يسلملي ذوقهم منذ قرابة العام، موضحة أنها تعمل على إيجاد الكلمات واللحن المناسبين لها وللذوق العام.
نادية مصطفى: مبقيناش نتوقع النجاح زي زمان.. نفسي أقدم جديد ولكن غصب عني
وقالت نادية مصطفى، في لقائها مع القاهرة 24: مبقيناش نتوقع النجاح، زمان أول ما سمعت أغنية سلامات قلت دي هتنجح وتكسر الدنيا، فكان فيه مؤشرات من الشكل العام أن الأغنية هتنجح، دلوقتي لأ وأنا مش موجودة بالشكل المطلوب، يمكن لسبب إنتاجي بحت لأني بحاول قدر الإمكان أكون موجودة.
وأردفت نادية مصطفى: مبقاش في الحفلات اللي شبهي غير مهرجان الموسيقى العربية وأنا الحمد لله موجودة فيه، ومهرجان القلعة اللي ببقى سعيدة جدًا وأنا موجودة فيه لأنه للناس البسطاء، وأنا ببقى سعيدة جدًا لأن الناس دي متشوقين للفن وبيبقوا عايزين حفلة في متناول أنهم بيدفعوا حاجة رمزية، الناس متعطشة للفن ومصر هي هوليوود الشرق.
وأضافت: نفسي كل يوم أقدم جديد ولكن غصب عني، وبيتعرض عليا أغاني كتير ولكني نفسي في حاجة أحس أنها شبهي، وأنا جربت قبل كده وعملت أغاني مش شبهي ومنجحتش، أنا بمشي ورا إحساسي شوية.
نادية مصطفى تعلن نيتها في ارتداء الحجاب
وعلى جانب آخر، سبق وكشفت الفنانة نادية مصطفى عن رغبتها الصادقة في ارتداء الحجاب، حيث قالت في تصريحاتها لـ القاهرة 24: أنا مش بعمل حاجة حرام، ولا بطلع أعرّي نفسي، ولا بقول كلام مبتذل، وده اللي ربنا هيحاسبني عليه، ونفسي ربنا يساعدني وأقدر ألبس الحجاب هو قرار صعب.. وبتمنى من قلبي أعيش اليوم اللي آخد فيه القرار عن اقتناع ورضا، لما بنتي لبسته، قلتلها: فرّحتي قلبي.
