كنت مهدي السرعة وحاجة خبطت فيا.. أقوال سائق التريلا في حادث مطاردة طريق الواحات| خاص
كشفت التحقيقات في قضية مطاردة طريق الواحات عن تفاصيل الحادث، واللحظات الأخيرة قبل إصابة المجني عليهن.
أقوال سائق التريلا في حادث مطاردة طريق الواحات
وحصل القاهرة 24 على نص التحقيقات في قضية مطاردة طريق الواحات والتي حوت أوراقها أقوال صاحب التريلا، حيث جاءت أقواله بسؤاله أمام جهات التحقيق ما معلوماتك بشأن الواقعة محل التحقيق؟
ج: اللي حصل إن أنا شغال في شركة المقاولين العرب على عربية نقل ويوم الواقعة أنا كنت محمل أسفلت ورايح بيه عشان احنا بتعمل مرمات على الطريق قدام مساكن عثمان والمهم أنا كنت مهدي السرعة خالص عشان الملف كان قريب وملتزم في الحارة الشمال لاقيت فجأة حاجة رزعت في العربية من ورا جامد وبعدين لاقيت كل عربية مشغلين الانتظار وجريوا علطول على الطريق أكنهم عاملين حاجة وبعدها أنا نزلت أشوف في ايه لاقيت عربية فيها بنات خابطين في العربية بتاعتي وبس دا كل اللي حصل.
س: متى وأين دارت أحداث تلك الواقعة؟
ج: الحادثة دي كانت على الساعة 6 إلا ربع تقريبا الصبح يوم الأربعاء في طريق الواحات قدام مساكن عثمان.
س: من كان برفقتك آنذاك؟
ج: كنت لوحدي.
س: ما هي كانت مناسبة تواجدك بالمكان والزمان سالفي الذكر؟
ج أنا كنت محمل أسفلت في العربية النقل وكنت بلف من قدام مساكن عثمان عشان بنعمل مرمات في الطريق.
س: صف لنا تحديدا كيفية وقوع الحادث؟
ج: الحادثة حصلت أثناء ما أنا سايق العربية ومهدي السرعة خالص لقيت فجأة عربية خبطت فيا من ورا جامد.
س: أيا من حارات الطريق كنت تستقلها؟
ج أنا كنت ماشي في الحارة الشمال.
س: ما هي سرعة السيارة قيادتك قبيل وقوع الحادث؟
ج كانت تقریبا سرعتي 10 عشان الملف كان قدامي على طول.
س: ما حالة الطريق من حيث المارة والزحام؟
ج الطريق كان فاضي.
س: ما هي كانت حالة حارات الطريق من حيث الإصلاحات؟
ج: لا مكنش فيه إصلاحات والطريق كان كويس.
س: ما التصرف الذي بدر منك عقب اصطدام سيارة المجني عليهن بك؟
ج: أنا لقيت الأول في كذا عربية جمبي ماشيين ومشغلين الانتظار وبيجروا أكن فية حاجة وبعدين نزلت من العربية أشوف فيه إيه.
س: كم عدد السيارات التي أبصرتها أنذاك؟
ج لا معرفش بس هما كانوا كذا عريبة.
س: ما مواصفات وأرقام تلك السيارات؟
ج: لا مقدرش أحددهم.
س: ما الذي أبصرته تحديدا أنذاك؟
ج: لقيت عربية سودة فيها بنات والعربية نصها تقريبا كان تحت العربية النقل بتاعتي.
س: ما هي كانت حالة الفتيات مستقلي تلك السيارة؟
ج كلهم كانوا واعيين وواقفين على رجليهم عادي.
س: هل من ثمة إصابات أبصرتها بمختلف عموم جسد أيا منهم؟
ج: أنا أخذت بالي من واحدة منهم كان فيه دم في منطقة الجبهة.
س: هل عاود أيا من مستقلي السيارات التي أبصرتها لمحل الواقعة مرة أخرى عقب الحادث؟
ج لا.
س: ما الذي حدث عقب ذلك؟
ج الناس ابتدت تتجمع وفيه ست بعربيتها كدا وقفت وأخذت البنات وطلعت على المستشفى وبعدها بشوية ونش جه أخد العربية.
س: ما قولك فيما شهد به المجني عليهن بتحقيقات النيابة العامة؟
ج لا معرفش انا مشوفتش حاجة هما كانوا ورايا بس شوفت في الفيديو إن هما باين كانوا بيزنقوا عليهم.
س: ما قولك فيما جاء بأقوال المتهمين بتحقيقات النيابة العامة؟
ج لا الطريق كان سليم وفاضى ومفیهوش أي حاجة ولا إصلاحات وطریق عریض.
