إشادة بأحد رجال المرور في بني سويف: بيعدي المرضى الطريق
تداول أحد مستخدمي مواقع التواصل الاجتماعي، منشورًا تضمن إشادة بأحد رجال المرور في محافظة بني سويف، وذلك بعدما أدى موقفا إنسانيا مع المواطنين في الشارع أمس، وخاصة أنه معروف بين أبناء المحافظة بشهامته.
إشادة بأحد رجال المرور ببني سويف: بيعدي المرضى الطريق
ونشر صاحب حساب يدعى القديس مار مرقس الرسول على الفيس بوك، منشورًا حول الأمين يوسف أبو كيرلس، الذي يعمل في محافظة بني سويف، قائلًا: الحقيقة معرفتش أصوره كويس لأني مكنتش عايزه ياخد باله، بس ده اسمه الأمين يوسف أبو كيرلس من بني سويف بيقف عند مديرية الأمن الجديدة، وهاحكيلكم حاجات بسيطة من مواقفه.
وأضاف: الأمين يوسف أبو كيرلس بيوقف العربيات للناس تركب، وبيعدي الناس الطريق وخاصة الناس اللي بتكون طالعة من المستشفى العسكري، وعاملة عمليات في عينيها، والنهاردة واقفين في عز الحر، ونص ساعة كاملة مش لاقيين فيها مواصلات ومفيش سواق راضي يحمل، حكم على سائق يوقف لنا ويحمل، وقال أنا مش هسيب الناس التعبانة دي في الشارع في عز الحر، دول زي أهلي، وبيقف يسند الناس الكبيرة وهي بتركب، شوفتله مواقف كثيرة جدا، وبيشوفه أكتر من مرة في الأسبوع ودايما بيعديني الطريق ويعدي أصحابي والمرضى، حبيت اشكره وأخلي الناس تعرف الشخصيات اللي زيه دي.
