مصدر بجامعة الأزهر عن شكوى طالبة الدراسات الإسلامية: عليها تقديم تظلم للعميد
علق مصدر بجامعة الأزهر، على شكوى إحدى طالبات كلية الدراسات الإسلامية والعربية، بجامعة الأزهر، بشأن تعرضها للظلم، وذلك بعد رسوبها في 3 مواد، قائلًا: عليها تقديم تظلم وشكوى للعميد.
مصدر بجامعة الأزهر عن شكوى طالبة الدراسات الإسلامية: عليها تقديم تظلم للعميد
وقال المصدر لـ القاهرة 24: هناك طالبات لا تحضرن ولا تتابعن المحاضرات وبالتالي ترسب في المادة، مؤكدا “من يتابع ويهتم يجد ثمار ذلك”.
وتابع المصدر: على الشاكية تقديم شكوى للعميد وتطالب بمراجعة أوراقها، منوها: فيه تظلم وبيتم مراجعة الورق.
شكوى طالبة الدراسات الإسلامية
وفي وقت سابق، اشتكت فاطمة عادل، طالبة في قسم الشريعة والقانون بكلية الدراسات الإسلامية والعربية بجامعة الأزهر، من تعرضها للظلم، بعد رسوبها في 3 مواد.
وكتبت عبر حسابها على موقع التواصل الاجتماعي فيس بوك: الحقيقة أنا مش عارفة ليه محدش طلع من الطالبات قبل كده واتكلم عن الموضوع دا، هل اعتدنا الظلم ولا مفيش رجاء نوصل لحاجة أو انعدم العدل من منارة العلم والإسلام والمفروض كلها قيم ودين، ولا كده كده صوتنا مش هيوصل وانعدم القانون كمان؟
أنا حاليا المفروض أتخرج سنة 2022، وكنت في كلية لغة عربية وشوفنا فيها ظلم كبير فغيرت الكلية (كده كده كنت عايزة شريعة وقانون وكان حلم ليا كبير من الأول).
وتابعت: طيب اللي بيحصل في شريعة وقانون، في سنة تانية عدت السنه ليه؟، على 3 مواد وهما (قرآن أولى وتانية وأصول فقه أولى).
وواصلت: طب هل دا عقل يستوعب إني خاتمة للقرآن الحمد لله والفضل لله من صغري؟ وحاليا بشتغل مُعلمة قرآن، فهل منطقي؟ لا
وقتها عملنا تظلمات واتكلمنا وفي الآخر لا حياة لمن تنادي.
وأكملت: حاليا سنة تالتة، معظم الدفعة عادت على نفس المواد من ضمنها القرآن، هل منطقي إن أكتر من نص دفعة تعيد على نفس المواد؟
طيب هل منطقي إني أشيل قرآن للسنة السابعة، وهل منطقي إن الدكاترة نفسهم اللي بيمتحنونا يبلغوني إني في الشفوي نجحت الحمد لله وإني جاوبت كويس، وكل الورق اللي راجعنا إجاباتنا لقينا نفسنا ناجحين، وفي الآخر ننزل برضو: قل لن يصيبنا إلا ما كتب الله لنا، والخيرة فيما اختاره الله، ولكن الساكت عن الحق شيطان أخرس.
