هاجر الشرنوبي عن عملها بائعة آيس كريم: فخورة بنفسي وعملت حاجة بـ 100 راجل
علقت الفنانة هاجر الشرنوبي، على تصريحاتها بـ عملها بائعة آيس كريم من أجل توفير المصروفات الدراسية لـ نجلها، والحالة التي أثارتها عبر مواقع التواصل الاجتماعي بين مؤيد ومعارض لتصريحها.
وقالت هاجر الشرنوبي، في تصريح خاص لـ القاهرة 24: لما حكيت أني بعت آيس كريم علشان أوفر مصاريف مدرسة ابني محطتش في دماغي إيه اللي الناس ممكن تقولوا، دي حاجة حصلتلي وحسيت إنها ادتني قوة وفخورة أني عملت كده ومتكسرتش وموقعتش.
وتابعت هاجر الشرنوبي: عارفة أن الناس مظاهر وممكن يقولوا مكنتيش تقولي، ولكني عملت حاجة بـ 100 راجل.
هاجر الشرنوبي تكشف تفاصيل عملها كبائعة آيس كريم
وكانت كشفت الفنانة هاجر الشرنوبي، تفاصيل عملها كبائعة آيس كريم، حيث قالت في تصريحات تلفزيونية: كنت عايزة أدفع مصاريف مدرسة ابني، ووقتها مكنتش بشتغل خالص ولا بمثل، كنت قاعدة في إسكندرية.
واستكملت: اشتغلت أبيع آيس كريم عشان أدفع مصاريف المدرسة، والحمدلله كانت خطوة فارقة جدًا في حياتي، فجأة لقيت نفسي قدام مسؤولية حتى لو كنت متدلعة، المدرسة في شهر 9 وإحنا خلاص في شهر مثلًا 4 فهعمل إيه؟ طب إيه الشغل؟.
وأضافت هاجر الشرنوبي: رُحت بقى أبيع آيس كريم، كانت فترة مرهقة ونقطة تحول في حياتي، ما كنتش الأول بعرف أتعامل، بعد كده خلاص بقيت أتعامل وبقت فترة بجد فارقة جدًا في حياتي.
