تراشق إعلامي.. القصة الكاملة لـ أزمة أحمد حسن وشوبير
دخل الثنائي أحمد حسن نجم منتخب مصر السابق والإعلامي أحمد شوبير، في أزمة بسبب التراشق الإعلامي بينهما.
القصة الكاملة لـ أزمة أحمد حسن وشوبير
حيث قال الإعلامي أحمد شوبير في تصريحات تليفزيونية على فيديو متداول لـ أحمد حسن وعصام الحضري: مفيش داعي حد يطلع يقول كلمة ويغلس فيها على حسام حسن.
وأكمل: هخدها يا سيدي إنك بتهزر ولكن مش وقته خليها يعم لما الأسبوعين بتوع التوقف الدولي يخلص، إنما مش علشان كان نفسك تكون معاه في الجهاز أو تكون مدير عليه في المنتخب ومحصلش فـ تعملوا كدا، هل ده مقبول ومعقول اللي بيحصل.
واختتم قائلا: يا أخي خلينا نركز.. انتوا مسؤولين انتوا بتهزروا؟ الحاجات الصغيرة دي مش عاوزينها وحبوا بعض شوية.
رد أحمد حسن على شوبير
وحرص أحمد حسن الرد على شوبير من خلال حسابه الرسمي على فيس بوك قائلا: الكابتن شوبير طالع يدينا نصيحة على الهواء وردي هيكون هنا على الهواء، لو حابب تتطوع بنصيحة فأكيد رقم تليفوني معاك وكمان أرقام السادة المحترمين في اتحاد الكرة المصري، ولو كانت النصيحة صادقة ولوجه الله أكيد نتقبلها ونشكرك كمان، لكن طالما الكلام على الهواء فالرد هيكون على شوبير هنا على الهواء.
وزاد أحمد حسن: لمعلوماتك أنا أعمل مديرا لمنتخب مصر المشارك في البطولة العربية (بتكليف ومتطوعا دون أجر) في محاولة لرد جزء للمكان الذي صنع اسمي وتاريخي كلاعب أنهى مسيرته بلقب عميد لاعبي العالم أما بالنسبة لقصة هزاري أنا وعصام الحضري في القصة دي فهو أمر معتاد من سنين والجميع يراه ويشاهده ولم نراك يا كابتن يا كبير يوما تنصح أو تعترض ولكن طبعًا كلنا فاهمين دفعاك بقوة واستماتة واعتراضك ليه.
واختتم قائد منتخب مصر السابق تصريحاته قائلا: كابتن اهدى شوية ونصيحتي ليك ركز في شغلك أنت بس وفر نصايحك لحاجة تانية علشان الموضوع مش مستحمل فتن وخناقات جديدة وكفاية اللي بنشوفه وبيحصل كل يوم وأنت سيد العارفين.
