رضا حامد يكشف حقيقة طرد الزعيم له من مسرحية بودي جارد بسبب سوء أخلاقه
كشف الفنان رضا حامد عن حقيقة الأخبار المتداولة خلال الساعات الماضية، بشأن طرد الزعيم عادل إمام له من مسرحية بودي جارد بسبب سوء أخلاقه، وذلك بعد تصريحات الفنان شريف إدريس الأخيرة.
رضا حامد يوضح حقيقة طرد الزعيم له من مسرحية بودي جارد
وقال رضا حامد خلال تصريحاته مع القاهرة 24: أنا الحمد الله ملتزم ومعرفش حاجة اسمها سُكر وعارف ربنا وبصلي الفرض في معاده، والناس دايمًا بتقولي إنت فنان محترم.
وأضاف الفنان رضا حامد: سيبت مسرحية بودي جارد بسبب خلافات مع الإدارة مش علشان عادل إمام طردني كما يشاع.
وكان كشف الفنان شريف إدريس عن كواليس مسرحية بودي جارد، وكتب منشورًا عبر حسابه الشخصي بموقع التواصل الاجتماعي فيس بوك، قال فيه: فيه ممثل زميل كبير سنًا.. بقاله فترة طويلة جدًا كل ما يطلع في لقاء يقول إن الأستاذ عادل إمام مشاه من مسرحية بودي جارد علشان كان بيضحك أكتر منه، طيب لأول مره هحكي الواقعة اللي حضرها ناس كتير عايشين معانا في الدنيا.
وأضاف شريف إدريس: في واحدة من ليالي العرض الجميلة الزميل الممثل كتب رقمه في ورقة وحدفها لواحدة معجبة في الصالة خلال تحية العرض، شافه حد من بتوع أمن المسرح وراح بلغ الأستاذ عادل إمام، تاني يوم كان أستاذ عادل قبل العرض بيقعد يوميًا في الأوضة اللي بقعد فيها أنا وزميلي الممثلين بنقعد ندردش شوية قبل العرض.
وواصل شريف إدريس: فجأة الزميل دخل من باب المسرح ومعاه واحدة غريبة وفي حالة لا يرثى لها هما الاثنين، فالأستاذ عادل قال لمساعده مين دي وعرف أنها نفس الشخصية اللي حدفلها الرقم فبعت جابه وقام معاه بالواجب، وطبعا أستاذ عادل أخد موقف في لحظتها ودي كانت آخر ليلة عرض لهذا الزميل الممثل في مسرحية بودي جارد، أنا أول مرة أحكي الواقعة بس حقيقي الوضع بقى مستفز وياريت الزميل الممثل يحترم سنه وعيب إنه يطلع يكذب على الناس.
