ياسر فرج: أتمنى أشتغل مع كاملة أبو ذكري أو كريم الشناوي في رمضان المقبل حتى لو من غير فلوس
تحدث الفنان ياسر فرج، عن سبب ابتعاده خلال الفترة الماضية عن المشاركة في الأعمال الفنية، كاشفًا أيضًا عن بعض الشائعات التي تخرج بين الحين والآخر بأن سبب ابتعاده عن المشاركة طلبه مبالغ باهظة للعمل.
وقال ياسر فرج لـ القاهرة 24: سبب غيابي الأدوار التي تُقدم لي.. ونفسي أرضي الناس وأرجع ليهم بس هما منتظريني في عمل كويس.. وأنا مش بدور على الكم ولكن بدور على الرسالة التي تُقدم وكل اللي بيتعرض عليا لا يوجد به حكاية مهمة.
وأضاف ياسر فرج: بيتقال أني بطلب فلوس كتيرة عشان أشارك في أعمال وباين إن فيه حملات عليا ولكن أنا بدور على دور حلو في رمضان ولو من غير فلوس.. ونفسي أشتغل مع المخرجة كاملة أبو ذكري والمخرج كريم الشناوي والمخرج سعد هنداوي والمخرجة شيرين عادل والمخرج أحمد الجندي والمخرج حسين المنباوي، حتى لو بدور من غير فلوس.
ومن جانبه سبق أن أعرب الفنان ياسر فرج، عن رغبته في العودة للمشاركة في أعمال فنية مرة أخرى، وذلك بعد فترة من الابتعاد عن الساحة الفنية.
وكتب ياسر فرج، عبر حسابه الشخصي بموقع فيسبوك قائلًا: البوست ده بكتبه لكل اللي بيسألوني سواء في الكومنتات أو في الرسائل أنت فين؟ اختفيت ليه؟ عاوزينك ترجع تاني تمثل، أنا فعلًا اختفيت من فترة كبيرة نتيجة ظروف مرض ووفاة زوجتي وأم أولادي الله يرحمها.
وأضاف ياسر فرج: أنا نفسي ارجع تاني لشغلي ولمكانتي، وبحاول أرجع تاني، لكن للأسف الرجوع مش سهل خالص خصوصا في الظروف والطريقة اللي دايرة بها منظومة الشغل، الدنيا مقفولة علي دايرة من الصعب جدًا اختراقها، وللأسف أنا متعود إني السعي في الشغل إني اختار دور كويس واجتهد فيه والتزم بمواعيد شغلي، لكن مش متعود على إني أكلم شركات الإنتاج والمخرجين وأحاول أظهر في المناسبات المختلفة عشان اشتغل.
