أحمد سعد: هربت من البيت بسبب الفن.. والطبيب النفسي ساعدني اكتشف نفسي الحقيقية
كشف الفنان أحمد سعد، خلال الجزء الثاني من لقائه مع الإعلامية منى الشاذلي، في برنامج معكم، عن تفاصيل حياته الشخصية، وتجربته مع العلاج النفسي، مؤكدا أنه كان يبحث عن ذاته الحقيقية وسط الضغوط الاجتماعية والبحث عن القبول.
بدأ أحمد سعد حديثه، قائلا: على المستوى الشخصي، كنت حابب جدا أروح لطبيب نفسي، عشان أكتشف شخصيتي، كنت مش مستمتع رغم إن عندي كل العوامل اللي المفروض تخليني سعيد، لكن كنت تايه ومش لاقي نفسي.
وأضاف: مكنتش عارف أنا الشخص المتدين، ولا اللي مش متدين، دي طريقتي في اللبس ولا لأ؟.. كانت عندي تساؤلات كتير محتاجة إجابة، وكنت بعيش بشخصية مش بتاعتي عشان أرضي الناس.
وكشف عن أنه من خلال العلاج النفسي، اكتشف واحدا من أكبر عيوبه: كنت دايما بحاول أرضي الناس على حساب نفسي، وده خلاني أفقد الاتصال بشخصيتي الحقيقية.. وكنت فاكر إن ده اللي هيخليني محبوب، لكنه خلاني تايه أكتر.
وتابع: بسبب شغلي كان عندي حاجة اسمها حب الظهور.. كنت دايما بحب أكون في الصدارة، أهزر جامد وأكون الجوكر في أي قعدة، لكن ده دخلني في أزمة حقيقية، وخلاني مش قادر أشوف الحاجات الحلوة اللي عندي.
تصريحات أحمد سعد
واستكمل: كان في خلاف بيني وبين أهلي بسبب حبي للفن، وكنت وقتها عندي 14 سنة، واخترت إني أروح أغني في الأفراح وهربت من البيت، وكنت بخاف أتعب أو أفقد الوعي لأن محدش هيعرف أنا فين أو مالي.
وأضاف: بقولها بوضوح مبنصحش حد يعمل كده أبدا، ولو الزمن رجع بيا مكنتش سبت البيت، والمتعة مش في النجاح ولا في الناس، المتعة الحقيقية إنك تكون ذاتك، تكون شخص مش مصطنع، وتعيش بصدق مع نفسك.
