ملك أحمد زاهر: المسلسلات خارج رمضان مبتتظلمش.. وردود الفعل بتبقى سريعة
تحدثت الفنانة ملك أحمد زاهر، عن نجاح مسلسلها الأخير أزمة ثقة، وذلك بعد النجاح الذي حققته في موسم رمضان الماضي 2025، من خلال مسلسل سيد الناس، كاشفة عن رأيها في تقدم الأعمال داخل وخارج السباق الرمضاني.
وقالت ملك أحمد زاهر، في تصريح خاص لـ القاهرة 24: رمضان إحساسه مختلف شوية لأنك بتبقي بتصارعي وحوش وبتبقي عايزة تظهري بينهم، فالموضوع بيبقى يجنن لما فعلًا العمل بينجح وأنا كنت في مسلسل فيه نجوم مصر كلهم، ده بيبقى امتنان بالنسبة ليا.
وأردفت: أما خارج السباق الرمضاني بنعمل مسلسل بيتقال عليه بتاعك ويعتبر نازلة لوحدك أو معاكي شبه مسلسل أو اتنين وبيبقى أسهل تتشافوا أكتر والمسلسل مبيتظلمش وردود الفعل بتبقى سريعة والناس مش مشغولة بمسلسلات تانية.
ملك أحمد زاهر تتحدث عن تجربة مسلسل أزمة ثقة
كما سبق وتحدثت ملك زاهر، في تصريحاتها لـ القاهرة 24، عن تجربة مسلسل أزمة ثقة، قائلة: مكنتش متوقعة ردود الفعل دي، أنا عارفة إني تعبت وإني عاملة مجهود والشخصية مختلفة وجديدة، ولكني مكنتش متوقعة الكم ده من الردود الفعل الإيجابية دي على الدور وأنا ممتنة جدًا للجمهور.
وواصلت: الشخصية أثرت عليا نفسيًا جدًا، أنا كنت محتاجة معايا دكتور نفسي طول المسلسل وبعده، لأن الموضوع كان صعب جدًا، الواحد لو بيصور شخصيتين في عملين مختلفين الموضوع بيبقى صعب، ما بالك بتعملي شخصيتين في نفس المشهد ولازم يكون عندك أداءين مختلفين والموضوع كان بيأثر على أعصابي جدًا.
