وفاء عامر عن اتهامها بالاتجار في الأعضاء: هدافع عن نفسي بالقانون.. وكنت بطوف في الكعبة وبدعي ربنا يجيب حقي
حلت الفنانة وفاء عامر، ضيفة على الإعلامي أحمد سالم في برنامج كلمة أخيرة، للحديث عن اتهامها بالاتجار في الأعضاء ومساندتها لـ إبراهيم شيكا.
وفاء عامر تتحدث عن مساندتها لـ إبراهيم شيكا قبل وفاته:
وقالت وفاء عامر: قبل ما شيكا يموت روحت بيته لقيت إن مينفعش واحد عنده جروح في جسمه يسكن في البيت ده، زوجته قالتلي دافعين 100 ألف جنيه في بيت تاني، ابتديت أجمع تمن الشقة، مش من تيك توك ولا فيسبوك، ومعايا حد بيراجع ورايا الفلوس دي، جبت فلوس وجبت له بيت، بعت المحامي معاه شيك بتمن الشقة، فاضل على الشقة 150 ألف جنيه، وأنا عايزة استرجع الشقة دي، لأنها عاملة مشاكل بين هبة وعيلتها.
وفاء عامر عن اتهامها بالاتجار في الأعضاء: هدافع عن نفسي بالقانون
وتابعت: مين قال إني مدافعتش عن نفسي من اللي بيتقال عني، بدافع بالقانون ورفعت قضايا وقضاء مصر العادل خلاني قاعدة دلوقتي، والداخلية قوية ومحترمة ومش بتسيب حاجة.
وفاء عامر تنهار من البكاء على الهواء بعد اتهامها بتجارة الأعضاء:
وانهارت من البكاء قائلة: كنت بطوف في الكعبة وبدعي ربنا وبقول يا رب رد عليا مظلمتي، وكل واحد جاب في سيرتي، والناس كانت بتطبطب عليا ويقولولي بندعيلك كلنا، وواحد في الشارع قالي الحمل تقيل بس انتي قوية، أنا في مصر بلد القانون.
