كانت ماشية عكس.. سائق تاكسي يتعرض للضرب والسب من فتاة بالمهندسين بسبب خلاف على أولوية المرور
تصدر مقطع فيديو لـ فتاة تعدت بالضرب على سائق تاكسي بالمهندسين، تريند منصات التواصل الاجتماعي، حيث ظهرت فتاة تعتدي بالضرب على سائق تاكسي وقامت بسبه، بسبب خلاف على أولوية المرور بشارع جامعة الدول العربية.
وقال س. أ، سائق التاكسي المعتدى عليه بالضرب من فتاة بشارع جامعة الدول العربية، في تصريحات خاصة لـ القاهرة 24، أنا عندي 26 سنة عمري في حياتي ما تخيلت إنه ست في يوم من الأيام تعمل فيا كدا، عايز حقي ورد اعتبار ليا، البنت رفعت عليا الشبشب عشان كانت ماشية عكس في الطريق البطيء بالشارع، ولما وسعت لها تعدي من جنبي رفضت.
سائق تاكسي يتعرض للضرب والسب من فتاة بالمهندسين بسبب خلاف على أولوية المرور
وتابع س أ، سائق التاكسي: أنا مصدوم من الألفاظ الخارجة اللي صدرت من البنت، والشبشب بتاعها اللي رفعته عليا لسه معايا في التاكسي، والناس كلها في المهندسين شافت الواقعة وسمعت اللي حصلي، هي دخلت الطريق البطيء في نفس اتجاه الشارع ووسعت لها عشان تعدي من جنبي، ورفضت تعدي وفضلت تشتم ومكنتش متوقع كل الألفاظ اللي قلتها تطلع من واحدة ست.
وأضاف سائق التاكسي المعتدى عليه بالضرب: البنت نزلت من العربية وكلامها زاد عن حده، وصورتها عشان أقدر أجيب حقي.. صعبت عليا نفسي، أنا راجل متجوز وعندي عيال، ومرضتش أرد عليها عشان هي ست، بالرغم من إنها كسرت لي العربية وشتمتني وضربتني، والشارع كله شاهد على اللي عملته، أنا خريج سياحة وفنادق شعبة إرشاد سياحي وشغال شيف، وبشتغل على التاكسي عشان أحسن دخلي وأكفي مصاريف المعيشة، وأهلي ناس محترمة ومن عيلة كبيرة، ومكنتش أتوقع إنه يحصلي دا في يوم من الأيام.
