ميرهان حسين تكشف تفاصيل عودتها للساحة الغنائية: بجرب نفسي.. ودايمًا كنت مستنية الفرصة
كشفت الفنانة ميرهان حسين، عن تفاصيل عودتها للساحة الغنائية من جديد، موضحة أنها تعمل حاليًا على التحضيرات النهائية لـ أعدد من أغانيها الخاصة، وذلك بعد مشاركتها في برنامج ستار أكاديمي في بداية مشوارها الفني.
وقالت ميرهان حسين، في لقائها مع القاهرة 24: أنا نظرتي اختلفت شوية مع الوقت، لما بقيت أشوف الأمور بشكل أكبر وأنا بعيد عن الدوشة وضغط التصوير والتمثيل، بقيت شايفة أنا أقدر أعمل الحاجة اللي بحبها بنفسي أو على الأقل أشتغل عليها بنفسي، أنا كنت بقعد كتير منتظرة الفرصة أنها تجيلي من حد تاني، أو أن حد يغامر وميكونش شايفني في نفس الدور ويفضل يبعتلي نفس الدور، فقررت أني أشتغل على ده بنفسي وأشوف أنا حابة أعمل إيه وأعمله بنفسي.
ميرهان حسين تدخل عالم الغناء
وتابعت ميرهان حسين: بقالي فترة شغالة على مشروعي الغنائي الخاص بشكل خاص جدًا وعاملة فيه مجهود كبير وإن شاء الله يعجب الناس، وأنا محضرة أكتر من أغنية لسه مقررتش هينزلوا ألبوم ولا واحدة ورا التانية، وأعتقد أن الأغاني هتنزل سينجل لأني لسه بجرب نفسي، وإن شاء الله هنلحق موسم شتاء 2025.
