زوجة ضحية السلام: المتهمون ضربوه على السطوح ورموه من الدور الخامس
روت زوجة الشاب صلاح إبراهيم، ضحية واقعة القتل بمنطقة السلام، تفاصيل صادمة عن الجريمة التي راح ضحيتها زوجها بعد تعرضه للضرب المبرح ثم إلقائه من الطابق الخامس، قائلة: أنا عايزة حق جوزي اللي موتوه ورموه من فوق السطوح.
جريمة قتل شاب في السلام
وقالت الزوجة في بث مباشر لـ القاهرة 24، إن زوجها كان قد اشترى سيارة من أحد المتهمين بنظام القسط، وبدأ في سداد الدفعات الشهرية، لكن بعد أول دفعة بنحو 15 يومًا اتصل به المتهم وطلب استرجاع السيارة، قائلًا إنه سيعتبر المبلغ المدفوع إيجارًا.
وأضافت: زوجي رفض وقال له المبلغ ده تمن العربية مش إيجار، واللي بينا قانون، فالمتهم قاله أنا هعرف أجيب حقي.
وتابعت الزوجة: بعد المكالمة بـ 3 أيام جه لحد باب البيت الساعة 7 الصبح، وقال له تعال نتفاهم، وفعلًا نزل معاه، وكان معاه اتنين تاني، شالوه وحطوه في توك توك وراحوا بيه على بيت المتهم في منطقة السلام فوق السطوح.
وواصلت الزوجة: فضلوا يضربوه لحد ما مات، وبعد ما اتأكدوا إنه مات رموه من فوق الدور الخامس في الشارع، واتصل المتهم بطليقته اللي بتشتغل في مستشفى قريبة وقالها تعالي خديه، وفعلًا خدوه بالتوك توك ورموه قدام باب المستشفى، وقالت للناس إن عربية خبطته.
وأوضحت أن الأهالي أبلغوا الشرطة بعد العثور على الجثمان، وتبين أن الضحية توفي متأثرًا بإصاباته، مشيرة إلى أن قوات الأمن ألقت القبض على المتهمين.
وحرر محضر بالواقعة تحت رقم 20521 لسنة 2025، وتولت الجهات المختصة التحقيق في الواقعة لكشف ملابساتها الكاملة.
