الاعتداء بـ القلم على مسن السويس.. مشهد وجع بلد بحاله

في واقعة وجعت قلوب الناس قبل ما توجع عقلهم، راجل كبير في محافظة السويس اتعرض للإهانة واتضرب بالقلم على وشه من صاحب عقار، في مشهد صعب ومؤلم يخلي أي حد دموعه تنزل، والناس واقفة مش مصدقة، وبنته بتشوف أبوها بيتضرب قدام عينيها ومش قادرة تعمل حاجة.

هو فيه حد يرضاها؟.. هو اللي رفع إيده دي، يرضى حد يعمل كده في أبوه؟ يرضى يشوف أبوه بيتضرب ويتكسر قدام الناس؟

الراجل الكبير ليه حق حقه يتقدر ويتحترم، مش يتضرب ويتتهان.. ده تعب عمره كله، وشيبته دي وسام على راسه، مش سبب إن حد يمد إيده عليه.

اللي حصل في السويس ما ينفعش يعدي كده.. دي مش مجرد «صفعة»، دي صفعة على وش الأخلاق والإنسانية قبل ما تكون على وش الراجل الكبير.

لما نسمح إن الكبار يتهانوا، إحنا اللي بنفقد قيمتنا وهيبتنا كمجتمع.. الراجل ده لازم حقه يرجع، وبنته لازم تشوف العدالة بتتطبق.