مسؤولو الموارد البشرية بالمتحف المصري الكبير يكشفون كواليس البناء والتجهيز: الافتتاح لحظة فخر لكل عامل| خاص
تحمل المسؤولية والالتزام سر نجاح مشروع بناء المتحف المصري الكبير.. بهذه الكلمات عبر فارس كمال، مسؤول الموارد البشرية بمشروع المتحف المصري الكبير، عن فخره بنجاح المشروع وفرحته باحتفال افتتاح المصري الكبير.
وقال فارس كمال في تصريحات خاصة لـ القاهرة 24: اشتغلت في المشروع من البداية، من وقت وضع حجر الأساس، وحضرت كل تفاصيل إنشائه، وبناء المتحف المصري الكبير عمر تاني بالنسبة لأي حد اشتغل فيه، مكان المشروع بالنسبالي كانت مفاجأة لإن له سحر وروح خاصة، وإنه كل يوم نشتغل جنب الأهرامات حاجة مبهرة.
مسؤول موارد بشرية يروي تفاصيل بناء المتحف المصري
وتابع فارس كمال، مسؤول الموارد البشرية بالشركة المنفذة والمشرفة على بناء المتحف المصري الكبير: حجر أساس بناء المتحف وضع في سنة 2002، ولكن بدأنا العمل على المشروع بشكل فعلي واستلمنا أرض المتحف في أبريل 2012، ومن وقتها وإحنا شغالين، وكل مؤسسات الدولة كانت متعاونة وداعمة للمشروع عشان يكتمل.
وأضاف فارس كمال: كل العمالة والمعدات اللي المتحف كان محتاجها عشان إنشائه يتم كانت بتتوفر، وبالفعل تم الإنشاء بعمالة ومهندسين مصريين، حتى التصميمات اللي وضعها وحددها كانت من قبل مهندسين مصريين، ووصل عددنا لحوالي 8000 عامل من مهندسين وفنيين وعمال ومشرفين.
وتابع فارس كمال: كل العمال كانوا قد المسؤولية، حتي لو كان في عامل محل إقامته بعيد عن مكان المتحف برضه بيلتزم بالشغل ومواعيده، وأنا اعتبرته مشروعي الخاص، وكنت مستني اليوم اللي نفرح فيه كلنا بافتتاح المتحف المصري الكبير، وكل اللي اشتغلوا على مشروع بناء المتحف المصري الكبير فكروا نفس تفكيري، والالتزام وتحمل المسؤولية هما سر نجاح المشروع، احنا بنبني حضارة تانية جنب الأهرامات، المكان كله طاقة، وكان ممكن أقعد باليومين في الشغل عشان اللحظة دي، إحنا فخورين بالشغل في مشروع المتحف المصري.
تصميم المتحف خرافي ومتماشي مع منظر الأهرامات
فيما قال مينا خليل، أحد العمال المشاركين في بناء المتحف المصري الكبير: أنا شايف إن العالم كله بيحكي ويتكلم عن مشروع إحنا اشتغلنا فيه، وبالتالي إحنا فخورين بالعمل في بناء وتجهيز المتحف المصري الكبير، أنا اشتغلت 8 سنين في مشروع المتحف، وكنت دايمًا اتكلم مع العمال على إننا في مهمة وطنية، مش بنبني مشروع استثماري ولا بنك، لا دي حاجة كبيرة للبلد.
وأضاف مينا خليل، مسؤول الموارد البشرية بالشركة المنفذة والمشرفة على بناء المتحف المصري: تصميم المشروع إعجازي تم وضعه بشكل هندسي خرافي عشان يكون متماشي مع منظر الأهرامات في الخلفية، ولو إحنا بنفتخر إنه زمان كان عندنا الأهرامات والحضارة، دلوقتي جه اليوم إن المصريين عملوا المتحف المصري.
واستكمل مينا خليل: دي لحظة فخر لكل عامل ومهندس شارك في الحدث العظيم ده، لازم كل واحد مصري مد إيده في بناء مشروع ضخم ومهم زي المتحف المصري الكبير، والافتتاح النهاردة تتويج لجهد العمال المصريين أمام العالم كله، إحنا كنا بنشتغل 24 ساعة في اليوم، ووقت ما كانت البلد فيها ثورة إحنا كنا شغالين وواجهنا ظروف صعبة، وكل الوزارات كانت بتخدم على المشروع.
واختتم مينا خليل مسؤول الموارد البشرية: أهني الشعب المصري كله بمناسبة الافتتاح، افرحوا بالمشروع العظيم وافتتاحه، مصر لها ماضي وحاضر ومستقبل، افتخروا بالبلد وشعبها وناسها وتاريخها ورئيسها وبكلام العالم كله عنها، إحنا خطفنا الأنظار لينا بالمتحف المصري، وكله بيتكلم عن عظمة المصريين وعظمة تصميم المتحف، المتحف تصميمه صعب ومفيش حيطة فيه طالعة متساوية، كل تصميم صعب، وكمل بفضل عزيمة وإصرار المصريين.
