أم تستغيث بسبب تعرض صغيرها مريض ثلاسيميا للإهمال الطبي داخل مستشفى خاص
قالت سيدة تدعى ياسمين عبد اللطيف، إن صغيرها تعرض للإهمال الطبي داخل أحد المستشفيات الخاصة بالقاهرة، خلال نقل الدم، حيث يعاني من مرض بيتا ثلاسيميا، ويخضع خلال هذه الفترة لنقل الدم ضمن إجراء التحضير لجراحة زرع النخاع.
أم تستغيث بسبب تعرض صغيرها مريض ثلاسيميا للإهمال الطبي داخل مستشفى خاص
وقالت ياسمين عبد اللطيف والدة الصغير في تصريحات خاصة لـ القاهرة 24: سليم ابني عنده 11 شهر، اتشخص بمرض بيتا ثلاسيميا وهو في سن الـ 5 شهور، ومفيش علاج للمرض ده غير زراعة النخاع، والملف بتاعه في المستشفى مكتوب فيه كل تفاصيل حالته الصحية، ولكن كل شهر عشان بنروح المتابعات في المستشفى وكانوا بيفتحوا له ملف جديد دون الرجوع لـ للملف الأصلي، وبيتجاهلوا إنه مريض بيتجهز لزراعة نخاع.
وأضافت: ابني بيحتاج لنقل دم، ونقلنا دم في المستشفى دي 5 مرات وفي مستشفى تانية برا مرتين، وفي كل مرة كان بيتنقل له دم في مستشفى نسائم كان بيتعرض لمضاعفات صحية شديدة وأثار جانبية، على عكس المرتين اللي تموا في مستشفى تانية، وكانوا بيضغطوا عليا نفسيًا بسبب أسلوبهم في المعاملة، وفي كل مرة كانوا بيفشلوا في تركيب الكانيولا أكتر من مرة.
وتابعت: إيده ورجله ورقبته نزفوا بسبب تركيب الكانيولا، ودخلوه العناية المركزة وهو مش محتاجها، وطلعونا الحضانة، وفجأة قطع النفس من كتر الصويت والوجع لدرجة إنه كل الناس اللي في المستشفى كانت بتسألني إبنك مالوا وعنده ايه.
واستكملت الأم: نقل الدم في كل مرة قبل كدا كان بيستغرق ساعتين أو أكتر، لكن المرة دي تم بسرعة جدًا، وفجأة وهو نايم على دراعي اكتشفت المضاعفات، ووشه كان بيورم وبيصرخ وبيرجع وظهرت له حساسية في جسمه، ولما كلمتهم قالولي دا طبيعي ووقفوا نقل الدم، ومكنتش متوقعة كل دا يحصل، كلمة الدكتورة بتاعته اللي بتابع معاها برا، قالتلي وقفي نقل الدم فورًا وحتى لو هنكمل نقل الدم مش هيكون من نفس الكيس دا، وأنا اتخذت إجراء قانوني ضد المستشفى، وعملت محضر وهكمل في الإجراءات القانونية.
