حسام حسن: أنا لو أجنبي كان اتعمل ليَّ تمثال.. وصلنا كأس العالم وأمم إفريقيا بدون هزيمة
رد حسام حسن المدير الفني لمنتخب مصر على الانتقادات التي طالته هو وجهاز المنتخب مؤخرًا، وتحديدًا بعد خسارة المنتخب أمام أوزبكستان في نصف نهائي دورة العين الودية الدولية.
تصريحات حسام حسن
وفي تصريحات تليفزيونية قال حسام حسن: مشاركتنا في دورة العين تدريبية في المقام الأول سواء كسبنا الماتشين أو خسرنا.
وأضاف: أعتمد على جميع اللاعبين المتاحين.. عندي فريق كامل يعاني من إصابات، مبروك للمصريين اللي بجد الفوز في مباراة كاب فيردي.
وواصل حسام حسن: بقول للمصريين الطيبين إحنا بنجرب وبنشوف الطرق اللي بنلعب بيها.. هناك فريق يتم بناؤه.. منتخب المغرب لما أشرف حكيمي يغيب يقولو حكيمي غاب رغم وجود عدد كبير من النجوم لديهم.
ووجه حسام حسن رسائل قوية لمنتقديه قائلا: البهوات اللي بيقعدوا في الاستديوهات.. عاوز الناس دي تهدأ.. فيه شوية عاوزهم يهدوا نفسيتهم وحشة.. أنا لو مدرب أجنبي كنا عملنا له تمثال.
وأكمل: إحنا مصريين وبنحب بلدنا بنجتهد وبنفكر.. بحب بلدي وجمهوري وشعب بلدي.. عندي ثقة في كل الموجودين، عاوز أقول للناس اللي فاهمة وتحب بلدها أنا بتمرن تمرينة خفيفة علشان ألعب الماتش، اللعيبة دي لعبت 4 ماتشات في 10 أيام.
وواصل حسام حسن رسائله القوية لمنتقديه قائلا: بتصبر ليه على المدرب الأجنبي؟.. أنا مش باخد رزق حد.. هعمل زي المدربين الأجانب وأقول هي كدة وده اللي أنا شايفه.
وأردف: السوشيال ميديا خربت بيوت وبلاد وإن شاء الله مصر تفرح بمنتخبها.. لعيبة غلطت في الهدف الأول أمام أوزبكستان.. يطلع فنان يتريق.
واختتم حسام حسن رسائله لمنتقديه قائلا: كنا فرحانين بمدرب أجنبي طلع لاعب أو اتنين.. النهاردة إحنا طلعنا كام لاعب؟.. اهدوا شوية على بلدكم.. الجهاز ده وصل كأس عالم وأمم إفريقيا من غير هزيمة.
