تجاهل الخطيب ومجاملات المنتخب.. أبرز تصريحات ربيع ياسين نجم الأهلي السابق
كشف ربيع ياسين نجم الأهلي السابق، تفاصيل مفاجئة بشأن علاقته مع محمود الخطيب رئيس القلعة الحمراء بعد قرار إقالته من تدريب فريق دلفي المنافس في دوري الدرجة الثالثة، وموقفه من تولي تدريب منتخب الشباب.
أبرز تصريحات ربيع ياسين عن الأهلي ومنتخب مصر
وقال ربيع ياسين في تصريحات إعلامية: قعدت 33 سنة مش موجود في الأهلي بعد اعتزالي الكرة، ودا السؤال اللي عايز أساله لمحمود الخطيب، لكني مقابلتهوش من فترة طويلة.
وتابع: قرار تعييني مدرب لفريق دلفي كان تكليفا مباشرا من رئيس النادي الأهلي، لكن مختار مختار اللي بلغني بالقرار، والخطيب مكلفش نفسه ساعتها إنه يبعتلي ويعقد معايا، ولما خرجت من دلفي.. خرجت برة الأهلي تمامًا.
وواصل ربيع ياسين تصريحاته: زعلان من الخطيب لكن أنا أسطورة بتاريخي ومبارياتي مش بالكلام، وكنت سفير للأهلي في كل محافظات مصر لما كنت بسافر مع دلفي للمباريات، موضحًا: بعد نهاية الموسم جهزت تقرير مفصل عن الفريق وكان من المفترض إن الإدارة تجتمع معايا لمناقشته حتى لم تم الاستقرار على رحيلي.
وشدد: لو أخدت الفرصة في التدريب ومعايا حد في ظهري كان زماني في حتة تانية، لكن أنا ماليش وكيل أعمال، والوكيل أصبح أهم فرد في منظومة الكرة المصرية في الفترة الحالية، وفيه وكلاء السبب في وجود مدربين في أندية كبيرة ومنتخبات حاليًا.
وأضاف ربيع ياسين: أنا فزت بكأس إفريقيا من غانا ونيجيريا والجزائر ودربت بتروجيت وعملت فريق الكرة في سموحة بشهادة رئيس النادي، وبعد كل دا مش لازم يكون ليا وكيل، حتى لو قصرت في الملف دا لكني كنت مركز في شغلي.
وعن موقفه من تدريب منتخب الشباب بعد رحيل أسامة نبيه، قال: اسمى لن يكون مطروحًا في اتحاد الكرة نهائيًا لتدريب أي منتخب، ومش عارف أنا عامل إيه للناس، بعد رحيل أسامة نبيه، قلت لـ محسن صالح عضو اللجنة الفنية لاتحاد الكرة: اختاروا بما يرضي الله أهم شيء مصر.
وشدد: أنا عملت إيه علشان أقعد في البيت؟، أنا فزت ببطولة إفريقيا مع منتخب الشباب، وعملت جيل للكرة لكن محدش درس الأمر فنيًا ولا حد داري بشغلي، لكن إحنا بنقضي على أجيال بالمجاملات.
