عمرو السولية: رئيس الإسماعيلي قالي مش هينفع أوديك الأهلي.. الناس بتوع البلد هيدبحوني
كشف عمرو السولية، لاعب سيراميكا كليوباترا الحالي، كواليس رحيله عن الإسماعيلي وانتقاله إلى الشعب الإماراتي ثم انتقاله إلى الأهلي.
تصريحات عمرو السولية
وفي تصريحات إعلامية، قال السولية: سافرت مع علي جبر وعدد من اللاعبين، وبدأنا نتدرب مع الفريق الإماراتي لمدة 4 شهور، وبعدما أتممنا 18 عامًا سافرنا إلى النمسا، حيث تدربنا هناك لمدة أسبوعين، في النهاية، اختاروا علي جبر ولاعب آخر للانضمام للفريق الأول، وعندما عدنا إلى مصر، فوجئنا بالإسماعيلي يطلب منا العودة للتدريب مع الفريق الأول، ورغم إلحاح علي جبر بعدم العودة، قررت الاستمرار.
وأضاف: ذهبنا لفترة الإعداد في الإسكندرية، ثم بعد فترة من التدريب مع الفريق، تم إعادتنا إلى صفوف الناشئين كنوع من العقاب، فـ خدت شنطتي وقلت لهم مش هلعب تاني، ولكن بعد تفكير، قررت أن أعود للتدريب مع الناشئين وأثبت لهم أنني قادر على الصعود للفريق الأول.
وأشار عمرو السولية في تصريحاته: سجلت أول هدف في مسيرتي مع الفريق الأول بـ الإسماعيلي ضد الزمالك، وساعتها الأبيض كان في حالة سيئة، وأنا كانت أول مرة ألعب ضد هذا العدد من الجمهور، وفي غرفة الملابس كان هناك لاعبين كبار بطنهم واجعاهم من الخوف، والهدف اللي جبته كنت فرحان أوي بسببه، والفرحة كانت لا توصف.
وعن لقطته مع مرتضى منصور رئيس الزمالك السابق، علّق السولية قائلًا: كنا بنلاعب الزمالك في 2014-2015 وبعد الماتش نزل مرتضى وسلم على اللاعبين والكاميرا كانت ماشية وراه وكلمني وقالي انت مش عايز تيجي الزمالك لي؟ فـ أنا مردتش عليه وضحكت.
وعن رحيله إلى الشعب الإماراتي، أردف قائلًا: كان فيه عرض من الأهلي والزمالك وأنا كنت عاوز أسافر برة مصر، وقتها في الإسماعيلي مكنتش باخد فلوس خالص، ورئيس الإسماعيلي “محمد أبو السعود وقتها” قالي مش هينفع أوديك الأهلي الناس بتوع البلد هيدبحوني لو عاوز تروح الزمالك هاخدك أوديك من ايدك دلوقتي، قولتله أنا مش حابب أروح الزمالك، رئيس الإسماعيلي طلع في الاعلام قال ان انا مضيت للأهلي وانا مكنتش قعدت مع حد اصلا والناس قعدت تشتمني على الفيسبوك فـ قعدت مع رئيس النادي قولتله انت ازاي قلت كدة قالي في ناس شافتك إنك مضيت وقعدت معاهم في القاهرة، قولتله أنا مش بنزل القاهرة أصلًا، وبعد الموقف ده قولت لوكيلي يلا بقى نروح نقعد مع بتوع الأهلي ونخليها بجد بقى واتفقنا.
وأكمل عمرو السولية تصريحاته: كابتن طارق العشري طلبني في الإمارات وقبلها كنت ماضي رغبة للأهلي إن لو حصل حاجة ورجعت مصر هلعب للأهلي، لعبت 6 شهور هناك وكابتن طارق مشي والمدرب الجديد قرر يغير المحترفين كلهم وقالولي ممكن تكمل عقدك وتتمرن مع الناشئين، ولكني قلت مش هقدر أقعد 6 شهور من غير كورة فـ أنا هتنازل عن الفلوس وهرجع، وبعدين خلصنا مع الأهلي بس الموضوع كان صعب عشان الناس في الإمارات كانوا واخدين فكرة إن أنا رايح كوبري وجاي عشان الفلوس، ولذلك كانوا بيعاندوا إنهم يدوني الاستغناء ولكن بعدها خدت الاستغناء ومضيت لـ الأهلي.
وأتم: أول ما جيت الأهلي قعدت فترة طويلة مبشاركش وأحيانا كنت اسافر مع الفريق وأطلع برة القايمة، كنت باجي قبل التمرين بساعتين أتمرن في الجيم وبعد التمرين كنت بتمرن تاني لو قادر، لما مكنتش بلعب كنت بتمرن أحسن برضو وبكمل، ومطلبتش أخرج اعارة ولا اتكلمت مع حد.. لحد ما كابتن حسام البدري جه وخدت فرصة وكملت أساسي.
