السولية: لاسارتي مكنش مستوعب خماسية صن داونز.. واتخصملنا 10% قبل مباراة العودة
تحدث عمرو السولية لاعب سيراميكا كليوباترا الحالي والأهلي السابق، عن هزيمة الأحمر على يد ماميلودي صن داونز الجنوب إفريقي في 2019 بخماسية، وأثر الصدمة على لاسارتي، وسر الفوز بـ دوري 2019 التاريخي.
تصريحات عمرو السولية
وفي تصريحات إعلامية، قال عمرو السولية: لاعبو صن داونز تحسهم كتير أوي في الملعب قدامك والشمس فوقك، وبيعملوا زحمة في مكان وبيجمعوك في مكان وفجأة بتلاقيه رايح هو والجون، وكنا أول مرة نلعب قدام فرقة بتلعب بالطريقة دي، ولاسارتي بعد المباراة مكنش مستوعب اللي حصل واتكلم معانا إن فيه مباراة تانية.
واستكمل مازحًا: ففيه ماتش تاني إيه يعم انت بتهزر؟ اللاعيبة هتعتزل مش هتلعب الماتش التاني.
وأضاف: قبل محاضرة مباراة الإياب، شريف إكرامي دخل الأوضة قالنا خصم 10% من مستحقات اللاعبين، ولكن أنا كقائد للفريق مش مقتنع بالكلام دا، اللي حصل كارثة وعمرها ما حصلت في تاريخ النادي، ولكن الإدارة شكلها وحش قدام الجمهور، طيب إحنا عندنا ماتش عودة هنخش المباراة إزاي، ومعظم اللاعبين كانوا معترضين، ولكن مفيش حاجة هتتعمل غير إننا هنلعب الماتش ولازم نكسب ونصعد، وكنا مقدرين الجمهور عشان كدة حطينا لساننا في بوقنا، وحاسين إننا عملنا فضيحة.
وواصل عمرو السولية في تصريحاته: الفرق المنافسة في 2018 بالدوري كانوا متفوقين علينا وبقينا في مركز متأخر جدًا، فحسام عاشور طبع جدول الترتيب وحطه في غرفة الملابس وكان بيبعتلنا فيديوهات الناس بتتكلم علينا ازاي،.
واستطرد السولية: سيد عبد الحفيظ ساعتها كان دوره كبير جدًا وأسلوبه كان عامل مؤثر، وتعاهدنا إن أي ماتش لازم نكسب وناخد الـ3 نقط ونضع ضغط على المنافس، وطول ما أنا بكسب فالمنافس هيقع، ولذلك كان دوري صعب جدًا، وماتشات كتير خلصت بطريقة درامية منهم مباراة سموحة، قعدنا نضيع نضيع لحد ما سجلنا هدف لـ جيرالدو، ومكنتش قادر أخد نفسي من الفرحة والمجهود اللي كان بيتعمل، وحسيت إن روحي هتطلع، ولذلك كان فيه مباريات كتير كانت صعبة.
وعن انتقال عبد الله السعيد إلى بيراميدز، علّق قائلًا: اتفاجأنا بأن عبد الله السعيد مع بيراميدز في المباراة الأولى ضدنا بعد رحيله، ولكننا في الأول والأخير زملاء وكان بيننا عِشرة، وفيه حاجات مينفعش أعملها عشان شكلي هيبقا وحش فيها، فمينفعش مسلمش عليه مثلًا، وبيراميدز الفترة دي كان صعب للغاية.
وأردف: دوري 2018 فرق معايا كتير جدًا، خصوصًا إني كنت واخد حرية كبيرة جدًا في الدوري، ففرقت معايا جدًا.
واختتم عمرو السولية تصريحاته: الاعتماد الكبير وقتها كان على جبهة علي معلول ورمضان صبحي، ولكن حينها الفريق لم يكن قويًا في كل الخطوط.
