في أول تعليق| زوج ضحية الإمارات: لم أحبسها ودخلت البلد دون علمي.. ورفعت السكين على ابنتها لسجني| خاص
كشف محمد السيد حشيش، زوج ميار نبيل المعروفة إعلاميا بـ ضحية زوجها في الإمارات، حقيقة ادعاءات زوجته التي انتشرت الفترة الأخيرة على مواقع التواصل الاجتماعي، وسبب تمسكه بعدم الظهور والإدلاء بتصاريح.
زوج ضحية الإمارات: رفعت السكين على ابنتي عشان تحبسني
وقال زوج ميار في تصريحات خاصة لـ القاهرة 24، رفضت الحديث والظهور في بداية الأمر عشان ميار لسه زوجتي وأم بنتي، وده الي منعني أطلع أتكلم، ولكن بعد تماديها في الاتهامات قولت لازم أرد وعيب اللي هي بتعمله.
وأضاف: هي ظهرت في فيديو قالت إن أنا قافل عليها الشقة وهو في مصر، وأنا كنت طالب أوردر من الإنترنت، وأمن العمارة استلمه وهي نزلت شافت الأوردر، متسائلا: طب ازاي أنا حابسها وهي نزلت وشافت الطلب وكلمتني على واتسآب، وده دليل على إني محبستهاش كما ادعت.
وأوضح: اكتشفت إن ميار دخلت الإمارات يوم 15 أكتوبر 2025، بدون علمي، لحد ما تم إعلامي آخر شهر أكتوبر بقضية نفقة شاملة ومكنتش أعرف، ولما روحت المحكمة تفاجئت أنها في الإمارات.
وأردف: بعد كدة المصلحة الاجتماعية في الإمارات تدخلت بالصلح وحكمت بدفع مبلغ 2000 درهم للبيت والأسرة ويتم صرفهم بدء من يوم 1 ديسمبر 2025، موضحا: كانت تفتعل المشاكل حتى أقدمت في مرة برفع السكين على ابنتها عشان تتهما فيا، ولو كانت بلغت الشرطة كنت هتحبس.
وأضاف: بعد كل ده وصلنا إلى الطلاق وطلبت صورة من القائمة، وهما رفضوا والدنيا قامت، وبسبب ذلك قولت مش هطلق غير لما أشوف القائمة، وهي كمان أصرت على الطلاق في الإمارات، ومكنتش عارف ليه، رغم إني قولتلها أنا موافق بس نطلق في مصر.
وتابع: عرفت بعد كدة إن واحنا قاعدين مع بعض أخدت محفظتي والبطاقة ونزلتهم على السوشيال ميديا، ولما قولت هنزل إجازتي الثانوية عملت المشاكل دي كلها وقالتلي سيبني أنا وبنتك، والخناقة قامت.
وأوضح: قبل ما أسيبها وأسافر على مصر سيبت ليها فلوس هي وبنتي، وبعد كدة كلمت صاحبي عشان ياخد معلومات مني بالمحايلة، وتداركت ذلك، ولما وصلت مصر اتفاجئت إن ميار رافعة قضية طلاق، واتهمتني بقضية تبديد منقولات وأخذت حكم 6 أشهر، وأنا بقالي سنة في الإمارات ومعايا ما يثبت.
واختتم: حقها عندي الطلاق والقائمة الموجودة كارثة والقائمة تقترب من مليون جنيه، ومحتويات القائمة فوط وسجاد وحاجات شبه كدة.
