اتطلقت وجوزها عاطل.. أول تعليق من صاحب واقعة البشعة لفتاة في الإسماعيلية| خاص
تداول مستخدمو السوشيال ميديا، فيديو، لفتاة تجلس على الأرض لتجري عملية البشعة، وظهرت عليها ملامح الرهبة، وذلك لإثبات مدى صدقها بعد أن اتهمها زوجها بأنها لم تكن عذراء عند الزواج منها.
المبشع يكشف تفاصيل جلسة عروس البشعة
وقال القائم بعملية البشعة، في تصريحات خاصة لـ القاهرة 24: البنت اللي عملت البشعة عندي من كام يوم عندنا في الإسماعيلية اتطلقت، وطليقها سافر الزقازيق، كان دايمًا بينهم خناقات ومشاكل وكان آخرها المشكلة دي، هو مكنش بيشتغل معرفش ليه قبلت تتجوزه.
وتابع: بالنسبة للفيديو أنا تفاجئت به زيي زي الناس كلها ومتوقعتش يطلع تريند خالص، وحد من عندها هو اللي كان مصورها في الجلسة، وفي تفاصيل وأسرار في الجلسة مش هينفع أقولها لأن دي أسرار بيوت، والمشكلة واضحة في الفيديو زي مالناس شافتها، والعروسة اتطلقت خلاص يعني تم انفصال رسمي بين الاتنين.
وأثار الفيديو حالة هجوم واسعة على منصات التواصل الاجتماعي خلال الساعات الأولى من اليوم، حيث كتب صاحب حساب: حسبي الله ونعم الوكيل البنت مرعوبة مفيش أي خوف من ربنا، وأضاف مستخدم آخر: البشعة دي أسوأ حاجة في الحياة يا ريت الناس تبطل الطقوس والجهل ده لأنه لا يتفق مع المجتمع أو الدين، وتابع شخص آخر: ربنا ينتقم منكم البنت خايفة جدا بس مفيش قدامها حل تاني بس إزاي لسه موجودة العادات دي.
