قبل جلسة محاكمتها.. الاعترافات الكاملة لسارة خليفة: كل فلوسي رايحة على أولاد إخوتي ومصاريف البيت
تستكمل محكمة جنايات القاهرة الجديدة نظر جلسة محاكمة سارة خليفة و27 آخرين، بتهمة تكوين تشكيل عصابي فيما بينهم لجلب مواد تصنيع المواد المخدرة من الخارج، وتصنيعها داخل مصر وتوزيعها والاتجار فيها.
وكشفت التحقيقات في القضية التي حملت رقم 6838 لسنة 2025 جنايات التجمع الأول والمقيدة برقم 1347 لسنة 2025 كلي القاهرة الجديدة، والمتهمة بها سارة خليفة و27 آخرين، والمعروفة إعلاميا قضية المخدرات الكبرى،عن تفاصيل اعترافات المتهمة سارة خليفة.
وجاءت تفاصيل اعترافات سارة خليفة في القضية، كالاتي:-
س: ما الذي حدث وما هي ظروف ضبطك وعرضك علينا؟
ج: اللي حصل إني يوم الأربعاء اللي فات حوالي الساعة 10 بليل، كلمتني أم فتحي وقالتلي سيبي البيت عشان بيدورو عليكي وبيدوروا على خالد أبو فتحي، وأكيد ها يجولك عشان يسألوا على أبو فتحي وسيبي البيت وامشي، وأنا قولتلها أنا هامشي واسيب البيت ليه؟ أنا مالي ومالكو!! ولو أنتو خايفين أنا مش خايفة لأني ما بعملش حاجة غلط وقالتلي أنتي مش بتعرفي تسافري الإمارات قولتلها أيوة، أنا معايا إقامة ذهبية في الإمارات بس أنا مش هامشي، واسيب البيت وقولتلها لو أنتو شايفين إنكوا عملتوا حاجة غلط، أنا شايفة إني معملتش حاجة غلط.
س: متى وأين تم ضبطك؟
ج: أنا اتقبض عليا يوم الخميس الساعة 12 الظهر.
س: وما هي تفصيلات نشأتك؟
ج: أنا عندي أخ وأخت ووالدي حاليا بالمعاش ومامتي طول عمرها شغالة في مستشفى، ودلوقي شغالة في عيادة خاصة، وأنا طفلة كنت عايشة مع أمي وأبويا في النزهة وبعدين عشنا في العبور وأنا في أيام الكلية، وبعدين رحنا عشنا في مدينتي وأنا عندي 20 أو21 سنة وكنا عايشين في بيت واحد أنا وأختي وأخويا وأبويا وأمي واتجوزت 2015 واتطلقت في 2017، ومن ساعتها وأنا عايشة مع بابا وماما في البيت.
س: وما هي حالتك الاجتماعية إذًا؟
ج: أنا اتجوزت مرة واحدة وماتجوزتش تاني وحاليا مطلقة.
س: وما سبب طلاقك لتلك الزيجة السابقة؟
ج: أنا جوزي كان لاعب كورة ولما سافر بره مصر حياتنا بدأت ما تستقرش.
س: وهل انجبت ثمة أطفال ؟
ج: لا.
س: وما هي مراحلك التعليمية المختلفة؟
ج: أنا دخلت الابتدائية في مدرسة وبعدها روحت مدرسة الأورمان وأخدت الإعدادية وفي ثانوية عامة أخدتها من مدرسة حكومية كانت عند شغل مامتي في السلام، وبعدين دخلت كلية حقوق واتخرجت في 2008 وأخذت بكالوريوس إعلام من الأكاديمية الدولية للإعلام وكنت بشتغل هناك مذيعة وبدرس في نفس الوقت وأخذت بكالوريوس الإعلام قبل ما تجوز بحوالي 3 سنين.
س: وما هي الوظائف التي شغلتها خلال فترة حياتك ؟
ج: وأنا عندي 13 سنة كنت بعمل برنامج أطفال في إحدى القنوات، وفضلت شغالة في القناة دي في مصر مذيعة في برامج مختلفة وكانت كلها برامج منوعات، لحد ما دخلت الكلية أثناء دراستي في الكلية اشتغلت مذيعة في قناة أخرى قدمت فيها برامج كثير وكان نوعية البرامج أننا بنغطي أحداث افتتاح الأفلام والمسلسلات ودار الأوبرا، وبعدها اشتغلت في قناة المحور وكنت بقدم فيها برنامج وكان طبيعة شغلي بنزل أعمل مقابلات مع المتهمين وفضلت في البرنامج ده حوالي 4 سنين، وبعد البرنامج ده قررت أفتح عيادة وفي مرحلة من حياتي قبل ما أفتح العيادة كنت شغالة في دبي بعمل إعلانات على السوشيال ميديا، وكان فيه شركة إعلانات ماضية معايا كنت بعمل دعايا للفنادق وكنت بأخد من الفنادق دي نسبة من النزلاء اللي بيجوا كل شهر وأي حاجة بشكل عام بعمل لها دعائية وآخر شغل ليا إني فتحت عيادة تجميل في 2019 بس العيادة مش مرخصة باسمي وهي باسم شريكي الدكتور ( أ. ر)، ووقت الكورونا سافرت دبي وعملت شركة في دبي في 2021 أو 2022 اسمها سارة برودكشن وعمل الشركة هو تنظيم الحفلات للمطربين وآخر حاجة بجانب شغلي عملت برنامج اسمه سارة وبيكا في قناة اسمها هي، وفي العموم أنا في الغالب كل سنة بعمل برنامج بجانب شغلي وبسافر دولة خليجية بعمل إعلانات هناك.
س: وما هي تفاصيل أرصدتك بتلك الحسابات؟
ج: حساب بالجنيه المصري مش يستخدمه عشان تحويلات إنستاباي ويمكن يكونه فيه 70 أو 80 ألف جنيه بالكتير وبالنسبة للحساب الدولاري في نفس البنك في حوالي 3 آلاف دولار وحساب المصري فيه حوالي 800 ألف جنيه.
س: ما إجمالي الأرصدة البنكية؟
ج: حوالي 150 ألف جنيه.
س: هل من ثمة ادخارات مالية أخرى؟
ج: أنا معنديش فلوس برة تانية في البنوك واللي عندي دهبي حوالي 500 جرام دهب من ضمنهم الذهب اللي اتعرض عليا.
س: هل تمتلكين فواتير شراء قطع الحلي محتوى الحرز السابق؟
ج: أيوة.
س: وما قولك في عدم تناسب إجمالي دخلك الشهري المقدر 500 ألف جنيه تقريبًا مع أرصدتك البنكية التي لا تتجاوز 950 ألف جنيه؟
ج: أنا بصرف كتير.
س: ما هي أوجه إنفاقاتك اليومية والشهرية؟
ج: أولا أنا عايشة ما بين دبي ومصر وبصرف يوميًا المصاريف الشهرية أكل وشرب وكهرباء وبصرف على نفسي وشهريًا عندي صيانات وإيجارات، وعندي مصاريف مدارس ولاد إخواتي سنويًا، وأنا بدفعلهم نصف مصاريف المدرسة، وأخويا محمد أنا اللي بصرف عليه كل حاجة إيجار شقته في القاهرة الجديدة 20 ألف جنيه، وبدفع مدارس أولاده الثلاثة بالقسط على مدار السنة والثلاثة مصاريفهم 600 ألف جنيه في السنة غير المدرسة، وبصرف عليه في بيته وفي أكله وشربه لأنه بيشتغل معايا في الحفلات في دبي، والمرتب مش بيكفيه وأقساط لشقة أنا اشتريتها في التجمع قسطها 300 ألف كل 3 شهور وفيه دفعات كل 6 شهور.
س: وما مقدار تلك النفقات اليومية والشهرية؟
ج: حوالي من 100 ألف إلى 150 ألف جنيه شهريًا
س: وما صلتك بالسيارة ماركة هيونداي توسان سوداء اللون والسيارة ماركة رانج روفر؟
ج: العربية الرانج روفر بتاعت ماما والعقد بتاع العربية موجود في العربية، والعربية التوسان بتاعت زوج أختي والعقد بتاعها موجود.
س: وما سبب وجودها في حوزتك؟
ج: لأن والدتي عايشة معايا وبستخدم سيارتها وجوز أختي كان بايت عندنا وبستخدمها ساعات ولكن نادرًا.
س: وما صلتك بالعقار الموجود في العجوزة بمحافظة الجيزة؟
ج: دي شقتي وأنا عايشة فيها وهي شقة إيجار.
س: وهل يرافقك ثمة أشخاص في ذلك العقار؟
ج: أنا وماما وبابا عايشين فيها ومعايا شغالات بس إحنا عندنا شقة ثانية إيجار وماما وبابا مستقرين في الشقة في الدور الثالث.
س: سبق وقررتي بالتحقيقات وجود كاميرات مراقبة بداخل الشقة السكنية خاصتك؟
ج: عشان الشغالات سرقوني قبل كدة.
