بشرى عن قلة أعمالها: أنا فنانة ليها جمهور وتاريخ لكن السوق بيصدر ناس معينة
أعربت الفنانة بشرى عن استيائها من استبعادها من الترشيحات الفنية خلال السنوات الماضية في بعض الأعمال الموجودة على الساحة الفنية، ووجهت رسالة أيضًا للفنان أحمد السقا، بعد الهجوم الذي لاقاه مؤخرًا على مواقع التواصل الاجتماعي بسبب دعمه لـ محمد صلاح في أزمته مع ليفربول.
بشرى عن قلة أعمالها: أنا فنانة ليها تاريخ.. والسوق بيصدر ناس معينة
وقالت بشرى خلال لقائها مع القاهرة 24: أنا مسؤولة عن اللي بيخرج من لساني أنا.. وبقول الحاجات من وجهة نظري ساعات بتتفهم غلط، أنا مش بستغيث أو مش بدور على شغل وواثقة من نفسي وموهبتي الحمد الله، ونجمة في مكاني ومكانتي محفوظة، وأخدت جوائز كتير.
وتابعت: بيحصل شوية نوع من الاستبعاد بسبب كلام بيتقال عني إني مشغولة بالإنتاج والمهرجانات، وحاليا مركزة في شغلي كفنانة وأي كلام يتقال في ضهري بحب أصحح المعلومة علشان الجمهور لما بيشوفني بيسألني ليه مش موجودة ؟
وأردفت: فعلًا معاهم حق ليه فنانة شاطرة ليه فنانة لها تاريخ كويس وجمهور بيحبها وبيقدرها ومش أنا لوحدي في كتير زيي، والسوق بيصدر ناس معينة، وأستاذ يحيى الفخراني وليلى علوي كانوا بيعملوا مسلسل سنة آه وسنة لا علشان يسسيبوا فرصة لغيرهم يشتغلوا، إحنا دلوقتي لما بنمسك في حد بنعصره عصر.
واختتمت حديثها في رسالة دعم لأحمد السقا بعد دعمه لمحمد صلاح بسبب أزمته مع فريقه ليفربول قائلة: أحمد السقا عاطفي وبرج الحوت ومعروف عنه إنه بينصف المظلوم مش معقول نيجي ونقل أدبنا على واحد بيحاول ينصف المظلوم بإمكانياته وقدراته والموضوع أكبر مننا كلنا والله أعلم الحقيقة فين، فيه تفاصيل احنا مش مطلعين عليها، ومحمد صلاح دا نجم استثنائي عالمي رفع رأس المصريين والعرب في العالم لما نحسن إنه بيتعرض لظلم لازم كلنا نقف في ضهره.
