بعد فيديو السيارات المستعملة.. نهاد أبو القمصان تطالب بمقاطعة المصرية للسيارات احتجاجًا على تصريحات شادي الريان
طالبت المحامية نهاد أبو القمصان بمقاطعة الشركة المصرية للسيارات في منشور شاركته عبر حسابها الرسمي بفيسوك، احتجًاجًا على تصريحات رجل الأعمال شادي الريان رئيس مجلس إدارة الشركة حول أفضلية السيارات المستعملة، وما حملته من إهانة ضمنية للمطلقات، مضيفة أن القرارات التسويقية والشرائية لدى المستهلكين تتأثر بسلوكيات مسئوليها.
نهاد أبو القمصان تطالب بمقاطعة المصرية للسيارات احتجاجًا على تصريحات شادي الريان
وشاركت المحامية نهاد أبو القمصان عبر حسابها بمنصة فيسبوك للتواصل الاجتماعي منشورًا جاء فيه: العربية المستعمل زي الموتوسيكل المستعمل.. اللي شادي ريان وأصحابه قالوه عن العربيات المستعملة، ناس اعتبرته تلقيح على طليقته وإهانة للمطلقات، وده فتح غضب واسع من ستات كتير والرجال المحترمين.
وتابعت: أنا برفض تشبيه البشر بالأشياء أصلا، الإنسان مكرم على العالمين أيا كان جنسه أو وضعه الاجتماعي، ولو هنتكلم عن الأشياء كأشياء دون أي تشبيه أو ربط وبشكل عملي الموتوسيكل المستعمل زى العربية المستعملة، رخيص، موفر في البنزين، مش بيحتاج قائمة صيانة معقدة، وبيؤدي الغرض من غير فلسفة.. يعني اختيار اقتصادي ذكي لناس كتير، مش رمز فشل ولا مادة للسخرية.
وأضافت: الستات بيسيطروا على حوالي 50٪ من قرارات الشراء في سوق السيارات، شراء مباشر، أو قرار نهائي داخل الأسرة، يعني سوق ضخم ومستقر، لأن الستات مش جمهور عابر، دي قوة اقتصادية حقيقية، واللي بيخسرها بيخسر فلوس مش بس صورته، ومش بس كدا.. الستات عندهم قدرة تتبع غير عادية، يعني يقدرو يجيبو كل واحد شارك في الفيديو العبثي دا بشركته ويقاطعوا منتجاتهم.
واختتمت: الذكاء مش في الهزار.. الذكاء في الفهم، والمقاطعة وسيلة مهمة لو استخدمت هتخلي كل واحد يحط لسانه في بقه ويحترم الناس اللي فاتحه له البيزنس بتاعه.
