عمرو مصطفى: مصطفى ناصر حضر السنين العجاف بتوعي ومسابنيش
حرص الفنان عمرو مصطفى على ظهور الشاعر مصطفى ناصر رفقته في برنامج صاحبة السعادة، حيث يعد أحد أقرب أصدقائه وشريكًا لنجاحات عديدة على مدار آخر 7 سنوات.
وقال عمرو مصطفى خلال لقائه: مصطفى ناصر حضر الـ سنين العجاف بتوعي، وكان معايا في فترة صعبة أوي ومسابنيش، ومن حوالي 7 سنين قولت عايز أشوف الشعراء الجداد يمكن يجددوا ليا دمي، وكان مصطفى الوحيد اللي قاعد تنك فقولتله سمعني، وبعدين اختفى 6 شهور.
وأضاف الشاعر مصطفى ناصر: في يوم كان عمرو مصطفى عايز يقابل صناع جداد وكلم الناس عنده في المكتب وعزمنا على سحور في رمضان، وبعد ما اتسحرنا حسيت إن فيه حاجة غلط، ومش ده اللي إحنا متفقين عليه، وبعتله مرة واتنين، فرد عليا وقتها وقالي إنه في مرحلة دراسة، وبعد حوالي 6 أو 7 شهور عملت أغنية "ع عيني" لأخويا أحمد كامل وعمرو سمعها وعجبتها.
وأردف مصطفى ناصر: وقتها عمرو كلم صديق مشترك ولقيته بيكلمني وبيقولي عمرو قالب عليك الدنيا، وهيكلمك دلوقتي، وفعلًا كلمني ولقيته بيقولي تعالى حالًا وبعتلي لوكيشن ولما روحتله اتفاجئت إن اللوكيشن في عيادة، وقعد عمل لحن وقالي عقبال ما أدخل أكشف سابني أكتب الأغنية، وفعلًا عملنا الأغنية بس لحد دلوقتي منزلتش.
وأكمل: بقينا بنتقابل يوميًا ونشتغل وتحولت العلاقة من شاعر وملحن لاتنين صحاب وبيهتم بتفاصيل حياتي ويقولي أعمل كذا ومتعملش كذا، وحقيقي هو أشطر مَن رأت عيني، وكنا في مرحلة التجارب اللي بنشوف فيها الأغنية بتنجح ليه والأغاني التانية مبتنجحش ليه وبدأنا بأغنية "سيبوه يفكر في زمان".
وسرد مصطفى ناصر حكاية أغنية "سيبوه"، قائلًا: كنا قاعدين في الاستوديو وهو كان بيلحن ويدندن اللحن بتاع الأغنية وقولتله استنى وكتبت كلمات وعمرو دخل غنى الـ guid، وفضلت الأغنية 4 أو 5 شهور مبتنزلش، وأقوله نزلها الأغنية مهمة ومبيحصلش، وفي يوم كنا قاعدين مع مجموعة من أصدقائنا عند أستاذ طارق مدكور وعمرو سمعهاله وكل الناس عجبتهم الأغنية، فدخل تاني يوم عمرو الاستوديو وصورها، ولما ضربت كملنا الأغنية.
واختتم عمرو مصطفى ومصطفى ناصر الحلقة بإهدائهما أغنية خاصة للفنانة والمنتجة القديرة إسعاد يونس بعنوان "صاحبة السعادة"، تقديرًا لمجهودها ولتاريخها، كما أشار عمرو مصطفى إلى أن مصطفى مصطفى ناصر من الشعراء المهمين في الجيل الحالي، ويشارك في ألبوم الفنان حماقي الجديد بأغنيتين بالإضافة إلى أغاني جديدة للفنانة سميرة سعيد.
