يا زين ما ربيتي.. نهاد أبو القمصان تشارك موقفا نبيلا عن نجلها بعد اعترافه بالخطأ في حادث سيارة
تصدرت المحامية الشهيرة الدكتورة نهاد أبو القمصان منصة فيسبوك للتواصل الاجتماعي خلال الساعات القليلة الماضية، بعد مشاركتها كلمات مؤثرة عن نجلها إياد، بعد تعرضه لحادث بسيارته وتسببه في إيذاء إحدى السيارات واعترافه بالخطأ وتحمله المسؤولية.
يا زين ما ربيتي.. نهاد أبو القمصان تشارك موقفا نبيلا عن نجلها بعد اعترافه بالخطأ في حادث سيارة
وعبرت الدكتورة نهاد عبر حسابها الشخصي على منصة فيسبوك، عن فخرها بنجلها إياد بعد حادث صغير تعرض له خلال عودته من الإسماعيلية، وأوضحت أن نجلها تصرف بمسؤولية نادرة، حيث وقف على الفور بعد اصطدامه بالسيارة الأخرى، واطمأن على سائقها واعتذر له، كما رتب معه لإصلاح الأضرار من خلال ورشة متخصصة.
وقالت خلال منشورها: رجعت من الإسماعيلية لقيت عربية في البيت مخبوطة، سألت مين اللي خبطها؟ إياد قالي أنا يا ماما.. قلت له وأنت كويس يا حبيبي؟ فيك حاجة؟، قالي تمام الحمد لله، قلت إيه اللي حصل؟، قالي بيفادي حد خبط عربية، بس قالي إنه استغرب جدا إنه لما نزل يطمن على اللي سايق العربية التانية وسأله أنت كويس؟ فيك حاجة؟ أنا آسف خبطلك العربية، الراجل قاله أنت وقفت؟ أنا كنت فاكرك هتجري، إياد قاله أجري ليه؟ أنا غلطان وخبط عربيتك وأنا ملزم أصلحها لك، الراجل قاله أنا مشفتش قبل كده حد بيعمل ده بيجروا في الغالب.. خلاص أنا مسامح، قدر الله وما شاء فعل.
وأضافت: إياد قاله لاء دي خبطة هتتكلف أنت ذنبك إيه أنا عندي حد كويس بتعامل معاه واتصل بالورشة وهو واقف وقاله الأستاذ فلان هيجي شوف تصلح العربية إزاي وخدوا نمر التليفونات واتعرف على الراجل.
وواصلت: إياد بيحكي لي وهو مستغرب الناس إزاي ممكن تعمل غير كده، تهرب وما تتحملش مسؤولية أفعالها، الراجل ده ذنبه إيه، ولو حد عمل كده وهرب هو حمل دعوة مظلوم.
وشاركت عبر منشورها أيضًا: أنا بسمع ابني ودماغي بتقلب القضايا اللي بشوفها كل يوم، وإن في أغلبها هي رفض الاعتراف بالمسؤولية مش حتى تحملها رفض قول كلمة أنا آسف أو أنا آسفة سواء في العلاقات الأسرية أو العمل سبب 90% من المشاكل وعدم مواجهة النفس والإنكار أو الهروب، لو ربينا نفسنا وولادنا على الاعتراف بالخطأ وتحمل المسؤولية والأهم الاطمئنان على الطرف الثاني والاعتذار أعتقد الحياة هتختلف.
وعن نجلها ذكرت: رغم إني مشفقة على إياد إنه هيتحمل تكلفة تصليح عربيته وعربية تانية وده كثير عليه كشاب بس سعيدة إني ربيت إنسان محترم.
وشهد المنشور تفاعلًا واسعًا بين المتابعين، معبّرين عن إعجابهم بأخلاق الشاب وحثهم على تعليم أبنائهم القيم نفسها، مؤكدين أن تصرفه يمثل نموذجًا يحتذى به.
